Vətəndaş barəsində sosial şəbəkələrdə rüsvayedici məlumatlar yayacağı hədəsi ilə 19500 manat pul tələb edən 51 yaşlı Bəhlul Şıxalıyev Hacıqabulda saxlanılıb.
Bu barədə DİN-dən bildirilib.
Polis əməkdaşları tərəfindən onun üzərindən zərərçəkəndən hədə-qorxu ilə əldə etdiyi pulun bir hissəsi aşkar olunaraq maddi sübut kimi götürülüb.
Faktla bağlı Hacıqabul Rayon Polis Şöbəsində cinayət işi başlanılıb. B.Şıxalıyev barəsində məhkəmənin qərarı ilə həbs qətimkan tədbiri seçilib.
Hüquqşünas Ramil Süleymanov “Sherg.az”abildirib ki, hədə-qorxu ilə tələb etmə cinayəti hesab olunur:
“Bu əməl Azərbaycan Respublikasının Cinayət Məcəlləsinin 182-ci, yəni hədə qorxu ilə tələb etmə maddəsi ilə sanksiyalaşdırılıb. Hədə qorxu ilə tələb edən şəxs zərərçəkmiş şəxsin və ya onun yaxın qohumlarının şəxsiyyəti üzərində zor göstərməklə onların barəsində hansısa bir rüsvayedici məlumatları yaymaqla, əmlak tələb etmək hədəsi ilə və bu qəbildən olan hərəkətləri etməklə və ya hansısa bir hüquqlardan imtina və ya hansısa bir hüquqların əldə edilməsini tələb edir. Qeyd edim ki, bu hərəkətlərin edilməsi, üç ildən beş ilə qədər müddətə azadlıqdan məhrum etmə ilə cəzalandırılır. Eyni zamanda 19500 manatdan söhbət gedirsə, bu artıq xeyli miqdarda cinayətin törədilməsidir və Azərbaycan Respublikasının Cinayət Məcəlləsinin 182.2.4-cü maddəsinə uyğun şəkildə cinayət işi başlanılacaq. Şəxsin barəsində həbs qətimkan tədbiri tətbiq edilməklə gələcəkdə məhkəmənin də bununla bağlı 5 ildən 10 ilə qədər müddətə azadlıqdan məhrumetmə cəzası təyin etmək kimi hüququ var”.
