Azərbaycan Dəmir Yolları vaistəsilə bu ilin yanvar-aprel aylarında 2 979 167 sərnişin daşınıb.
Qurumdan Teleqraf-a verilən məlumata görə, bu göstərici ötən ilin eyni dövrü ilə müqayisədə 16% çoxdur.
Hesabat dövründə ən çox sərnişin Abşeron dairəvi marşrutu ilə daşınıb -123 089 nəfər.
Xatırladaq ki, 2024-cü ilin yanvar-aprel aylarında 2 566 218 sərnişin daşınıb.
Onu da bildirək ki, bu ilin birinci rübündə qatarla səfər etmiş xarici turistlərin sayı 33% artaraq 8281 nəfər olub.
Avtosfer.az saytının baş redaktoru, nəqliyyat eksperti Elməddin Muradlı Sherg.az-a bildirib ki, dəmiryollarının inkişafı göz qabağındadır:
“Təsadüfi deyil ki, bir neçə ay əvvəl Cənab Prezident jurnalistlərlə görüşdü, müsahibə verdi və orda da qeyd etmişdi ki, Azərbaycan Dəmir Yolları və Azərbaycan Hava Yolları ilk dəfə olaraq son iki ili gəlirlə başa vurublar. Yəni dövlət dotasiyaları, dövlətin köməyi olmadan həm öz xərclərini qarşılayıb, həm də dövlətə gəlir gətiriblər. Bu onu deməyə əsas verir ki, həm dəmir yolları, həm də hava yolları kifayət qədər inkişaf edib və geniş xidmət göstərir. Həmçinin nəzərə almaq lazımdır ki, pandemiya ilə əlaqədar olaraq quru sərhədlər bağlıdır və sərnişindaşıma həyata keçirilmir. O baxımdan da düşünürəm ki, sərhədlər açıldıqdan sonra dəmir yolunda inkişaf daha da qabarıq şəkildə özünü göstərəcək. Yeni qatarlar alınır, yeni dəmiryol xətləri salınır, bağlı qalan dəmir yol xəttləri açılır və sərnişinlərin istifadəsinə verilir. 30-40 ildir ki, təmir olunmayan dəmir yol xətləri təmir olundu, dəmiryol şəbəkəsinə yeni abu-hava gəldi. Bütün bunların hər biri sərnişinlərin marağını cəlb edir. Eyni zamanda, Bakı, Sumqayıt, Pirşağı və digər Bakı kəndləri istiqamətində, elektrik qatarları vasitəsilə sərnişindaşıma həyata keçirilir. Bu da müsbət təsir göstərir. Çünki Bakı, Sumqayıt yolunda və Bakı kəndləri istiqamətində yollar tıxacla dolur. İnsanlar artıq taksilərdən şəxsi maşınlardan deyil, dəmiryolu ilə hərəkətdən daha çox faydalanırlar. Yəni bütün bunlar onu göstərir ki, insanlarımızın bu nəqliyyat növlərinə marağı böyükdür və get gedə də bu maraq artmaqdadır”.
