Bir çox ölkələrdə dizel mühərrikli avtomobillərə qarşı məhdudiyyətlər tətbiq edilməsi planlaşdırılır.
Xəzər TV məlumat verir ki, Norveç, Niderland və Fransa yaxın illərdə dizel mühərrikli avtomobillərin satışını tamamilə dayandırmağı nəzərdə tutub.
Almaniyada isə bəzi şəhərlərdə havanın çirklənməsini azaltmaq məqsədilə dizellə işləyən avtomobillərin hərəkətinə qismən qadağalar qoyulub. Britaniya 2030-cu ildən etibarən yeni benzin və dizel mühərrikli avtomobillərin satışını dayandırmağı hədəfləyir.
Ölkəmizdə də belə avtomobillər kifayət qədərdir. Bizdə də belə addımlar atıla bilərmi?
Nəqliyyat eksperti Elməddin Muradlı “Sherg.az”a bildirdi ki, Azərbaycanda da bu istiqamətdə müəyyən addımlar atılır:
“Hazırda dizel yanacağı ilə benzin arasında qiymət fərqi cəmi 10 qəpik təşkil edir. Dizelin bir litri 1 manata, 92 markalı benzinin isə 1 manat 10 qəpiyə satılır. Bu vəziyyət dizel mühərrikli avtomobillərə qarşı müəyyən tədbirlərin həyata keçirildiyinə işarədir. Çünki əvvəllər dizelin daha ucuz olması onun sərfiyyat baxımından cəlbedici görünməsinə və insanların həmin avtomobillərə üstünlük verməsinə səbəb olurdu. Doğrudur, qiymət artımından sonra dizel mühərrikli avtomobillərin istifadəsində ciddi azalma müşahidə olunmur, lakin bunun təsiri müəyyən qədər hiss edilir. Bu proses fonunda elektrik və hibrid tipli avtomobillərə keçid meyli artmaqdadır. Ümumiyyətlə, avtomobillərlə bağlı məhdudlaşdırıcı tədbirləri əsasən o ölkələr həyata keçirir ki, onların yerli avtomobil istehsalı mövcuddur. Azərbaycanda isə belə bir vəziyyət müşahidə olunmur. Burada “istehsal” adı ilə təqdim olunan fəaliyyət əslində istehsal deyil, müxtəlif ölkələrin markalarının gətirilərək ehtiyat hissələrinin Azərbaycana daşınması və burada yığılmasından ibarətdir. Halbuki, istehsal anlayışı odur ki, ən azı 25–30 faiz avtomobil hissələri məhz həmin ölkədə istehsal edilsin. Azərbaycanda isə demək olar ki, bütün detallar xaricdən gətirilir və sadəcə birləşdirilir. Buna görə də bunu istehsal adlandırmaq düzgün deyil. Elə buna görə də avtomobil sektorunda qərarları əsasən öz istehsal potensialına malik ölkələr qəbul edir. Azərbaycanda isə dövlət səviyyəsində bu məsələlərin necə tənzimlənəcəyi barədə dəqiq proqnoz vermək mümkün deyil”.
