Xalq narazıdır: Dənizi hasarlayanların hasarı, mülkləri sökülməlidir

Yusif Nəzərli 12:58 16.04.2022 Cəmiyyət 440

Millət vəkili Razi Nurullayev parlamentin dünənki iclasında dəniz kənarına 130 metr məsafədən yaxın olan tikililərin sökülməsi təklifi ilə çıxış edib. Deputat bildirib ki, vətəndaşlar dəniz sahilində gəzmək və çimərliklərdən istifadə etmək istəyirlər: “Amma hər kəsin bildiyi kimi, Xəzər dənizinin sahili işğal altında qalmaqda davam edir. Son illər İDEA-nın rəhbəri Leyla xanım Əliyevanın təşəbbüsü ilə Bakı şəhərində ictimai çimərliklərin yaradılmasına başlanılıb, bunu alqışlayıram. Lakin bu, kifayət etmir. Dəniz Allah tərəfindən xalqımıza lütf edilən bir ilahi sərvətdir, Konstitusiyamız Xəzərdən maneəsiz istifadə hüququ verir. Hərə dənizin sahilində beş-on hektarı çəpərləyib. Bu qanunsuzluğu hər bir vətəndaş görür, yaşayır və narazı qalır. Sonra da onlara hüququn, qanunun aliliyindən danışırıq, hər kəsin qanun qarşısında bərabərhüquqlu olduğunu deyirik. Xalq da görür ki, bu fikir doğru deyil. Rəhmətlik Prezident Heydər Əliyevin fərmanı ilə dənizdən 130 metr kənarda tikinti işi aparmağa icazə verilirdi. İndi bu məsafə 30 metrə düşüb. Bu məsələni əsaslandırıb Prezidentə imzanı təqdim edənlər bu xalq və dövlət qarşısında məsuliyyət daşıyırlar, çünki öz torpaqlarını və mülklərini nəzərdə tutub bu addıma gediblər. Təklifim budur ki, dəniz kənarından 130 metr məsafədə tikintiyə qadağa qanunla təsbit edilsin, dənizi hasarlayanların hasarı və mülkləri sökülsün”.