Meşə yanğınları Los-Ancelesin bir sıra ərazilərində, o cümlədən elit rayonlarında insanların kütləvi təxliyə edilməsinə səbəb olub.
AZƏRTAC ABŞ KİV-lərinə istinadla xəbər verir ki, məşhur basketbolçu Lebron Ceymsin, Kaliforniya ştatının sabiq qubernatoru Arnold Şvartsenegerin, həmçinin aktyor Rayan Filippin evləri də təxliyə zonasına daxildir.
“Əgər eviniz təxliyə zonasına düşübsə, buna ciddi yanaşın... Mən Kaliforniya sakinlərini qorumaq üçün özlərini təhlükəyə atan dünyanın ən yaxşı yanğınsöndürənlərinə minnətdarlığımı bildirirəm”, - Arnold özünün “Twitter” səhifəsində belə yazıb.
Yanğınsöndürənlərin məlumatına əsasən, yanğınlar, həmçinin Los-Anceles şəhərində yerləşən “Getty” muzeyinə də təhlükə yaradıb.
Kaliforniya ştatının demək olar ki, bütün ərazisində güclü meşə yanğınları tüğyan edir. Yanğınlar ötən həftə 200 min nəfərin təxliyə olunduğu Sonoma dairəsində başlayıb. Oktyabrın 27-də qubernator Gevin Nyusom ştatın bütün ərazisində fövqəladə vəziyyət rejimi tətbiq edib. Ştatın 58 dairəsinin 43-də qırımızı təhlükə səviyyəsi elan olunub. Qubernatorun sözlərinə görə, hər il oktyabr ayında Kaliforniyada baş verən meşə yanğınları bu il güclü külək səbəbindən daha təhlükəli xarakter alıb.
