İsrailin Qəzza zolağında və Livanda atəşkəslə razılaşması İranın 26 oktyabr hücumundan sonra yəhudi dövlətinə qarşı cavab addımı atmaq qərarına təsir edə bilər. Bunu İran Prezidenti Məsud Pezeşkian deyib. O söyləyib ki, onlar çox yaxşı bilirlər ki, İrana qarşı hər hansı bir səhv etsələr, sarsıdıcı cavab alacaqlar. Yalnız onların davranışlarına yenidən baxması, atəşkəslə razılaşması və bölgədə günahsız insanların öldürülməsini dayandırması bizim necə və hansı qüvvə ilə cavab verəcəyimizə təsir edə bilər.
Orta Doğu Araşdırmalar Mərkəzinin sədri, politoloq Sədrəddin Soltan “Sherg.az”a bildirib ki, İranın bütün rəsmiləri İsrailə cavab atəşinin ediləcəyini bəyan ediblər:
“Ötən gün İranın Ali Rəhbəri Əli Xamenei açıq şəkildə söylədi ki, İsrailin hücumunu cavabsız qoymayacaqlar. Rəsmi İran bunu müxtəlif hümanitar məsələlərlə əsaslandırmağa çalışsa da, hər kəsə bəllidir ki, iki ölkə arasındakı qarşıdurma regionda maraqları olan güclərin savaşının təzahürüdür. Bu təkcə İran-İsrail savaşı deyil, Qərblə Şərqin münaqişəsidir. Məsud Pezeşkianın açıqlaması da deməyə əsas verir ki, İran hakimiyyəti İsrailə cavab vermək üçün uyğun vaxtı gözləyir”.
