Bazar günü Gürcüstanın Batumi şəhərində etiraz aksiyası zamanı 8 nəfər saxlanılıb.
“Report” xəbər verir ki, bu barədə Acarıstanın Batumi şəhər polis idarəsinin rəisi İrakli Dqebuadze jurnalistlərə bildirib.
Saxlanılanların hamısı inzibati xətalarda - polis əməkdaşlarını təhqir etməkdə və müqavimət göstərməkdə ittiham olunurlar”, - Dqebuadze bildirib.
Gürcüstan mətbuatının məlumatına görə, Acarıstan Hökumət Evi yaxınlığında keçirilən etiraz aksiyasında vəziyyət Tbilisidən gələn müxalifət partiyası “Dəyişikliklər uğrunda Koalisiya”nın liderləri Yelena Xoştariya və Giorgi Kirtadzenin etirazçılara qoşularaq hökumətə tabe olmamağa çağırmasından sonra gərginləşib.
Xoştariya və Kirtadze polis tərəfindən saxlanılıb.
Bir gün əvvəl Batumidə hökumət siyasətinə qarşı etiraz aksiyasının 10 iştirakçısı da saxlanılıb, onlardan dördü yaxın günlərdə məhkəmə qarşısına çıxmaq üçün zaminə buraxılıb.
Bazar günü Tbilisidə hakimlərin korporativ iclasının keçirildiyi “Babilo” restoranının yaxınlığında polislə etirazçılar arasında toqquşmalar da baş verib.
Gürcüstanın Patrul Polisinin rəis müavini Sergi Bzişvilinin jurnalistlərə verdiyi məlumata görə, restoranın qarşısında etiraz aksiyasının bir neçə iştirakçısı saxlanılıb.
“Saxlanılanlar qanunsuz olaraq yolu bağlayıb, polisə yumurta atıb və onları təhqir ediblər”, - Bzişvili bildirib.
Hazırda Tbilisinin Rustaveli prospektində Gürcüstan parlamentinin binası yaxınlığında etiraz aksiyası keçirilir.
