Britaniya hökuməti Ukraynada sülh yolu ilə nizamlanmanı müzakirə etmək üçün Londonda Avropa liderlərinin görüşünü keçirməyi planlaşdırır.
Bu barədə “Skay Nyus” mənbələrə istinadla məlumat yayıb.
Kanal görüşün dəqiq tarixinin hələ müəyyənləşdirilmədiyini bildirib.
Qeyd edək ki, fevralın 17-də Fransa Prezidenti Emmanuel Makronun təşəbbüsü ilə Parisdə səkkiz Avropa ölkəsinin lideri, həmçinin AB və NATO nümayəndələri arasında danışıqlar keçirilib. Fevralın 19-da isə daha geniş formatda ikinci müzakirə baş tutub.
Politoloq Sahil Kərimli "Sherg.az"a bildirib ki,Rusiya-Ukrayna müharibəsi ilə bağlı əsas söz sahibi Donald Tramp administrasiyasıdır:
"Avropa İttifaqı (Aİ) ölkələrinin hər hansı müdaxilə və cəhdinə baxmayaraq, artıq Rusiya və ABŞ arasında çox ciddi danışıqlar başlayıb. Müzakirələrin nəticələri haqqında səsləndirilən rəsmi bəyanatlarda da prosesin Putin və Trampa sərf edən formada olduğunu görürük. Növbəti mərhələdə də Vaşinqton və Moskva arasında aparılan fikir mübadiləsi sübut edir ki, Zelenski hələ ki prosesdən uzaq tutulur. Həmçinin Ukraynanın mövqeyi nəzərə alınmır".
Politoloqun fikrincə, münaqişənin Aİ ölkələri tərəfindən uzadılması cəhdi heç bir nəticə verməyəcək:
"Çünki ABŞ və Rusiya münaqişənin nəticəsi barədə müəyyən razılığa gəliblər. Aİ isə bundan çox ciddi narahat olur. Lakin dünyanın iki nəhəng ölkəsi artıq Ukraynanın müharibədə uduzdurulması istiqamətində addımlara başlayıb. Aİ və NATO gələcəkdə Rusiyadan təhdidlərlə bağlı təşvişə düşüblər. Xüsusilə Fransa Prezidenti və Böyük Britaniyanın Baş naziri də bu günlərdə müzakirələr, təmaslar üçün ABŞ-a səfər etməyi planlaşdırırlar. Onlar Donald Trampla görüşmək və indiki mövqeyindən geri çəkindirmək niyyətindədirlər. Lakin bu, heç bir nəticə verməyəcək. Çünki ABŞ bütün dünya ictimaiyyəti qarşısında öz siyasi mövqeyini bəyan edib".
