ABŞ Prezidenti Donald Tramp Ukrayna lideri Vladimir Zelenskidən məktub alıb.
Bu barədə Tramp ABŞ Konqresinin hər iki palatasında çıxışı zamanı deyib.
Tramp qeyd edib ki, Zelenski məktubda Kiyevin Ukraynadakı vəziyyəti nizamlamaq üçün danışıqlar masası arxasına oturmağa hazır olduğunu bildirib:
“Bu gün Zelenskidən vacib məktub aldım, Ukrayna mümkün qədər tez danışıqlar masasına oturmağa hazırdır”.
Qeyd edək ki, bundan əvvəl Ukrayna prezidenti Volodimir Zelenski ABŞ prezidenti Donald Trampla uğursuz danışıqlardan sonra Vaşinqtonda Ağ evi vaxtından əvvəl tərk edib. Tramp deyib ki, Zelenski "Birləşmiş Ştatlara hörmətsizlik edib" və "sülhə hazır olanda qayıda bilər".
Politoloq Tural İsmayılov "Sherg.az"a deyib ki, ABŞ Trampın rəhbərliyi altında Ukraynaya təzyiqləri ən kəskin vəziyyətə çatdırıb:
"Hələ Donald Trampın seçki kompaniyası dövründə hakimiyyətə gələcəyi təqdirdə ABŞ-ın Ukrayna ilə bağlı xarici siyasətində sərt müzakirələrə səbəb olacaq və dərin konfrontasiyaya söykənən siyasət həyata keçirəcəyi bəlli idi. Bu gün Ağ Evin yeni rəhbərliyi Bayden hakimiyyəti dövründə Kiyevə verilən milyardlarla dolları yenidən ABŞ büdcəsinə qaytarmaq istəyir. Həmçinin bütün bunların fonunda Vaşinqtonun Rusiya ilə imzalanacaq müqavilədən sonrakı Ukraynanın quruculuğuna töhfə verməsi üçün bu ölkənin təbii sərvətlərini istismar etmək niyyətindədir. Faktiki olaraq, təhlükəsizlik zəmanəti boş bir tələbdir. Çünki Tramp heç vaxt Rusiya ilə açıq qarşıdurmaya gedəsi deyildi. Eyni zamanda heç Baydenin belə atmadığı addımı atıb Ukraynada NATO qoşunlarının fəaliyyətinə şərait yaratmayacaqdı. Digər tərəfdən gələcək Ukrayna üçün çox qaranlıq görünür. Ona görə ki, Avropa investorları Ukraynanın sərvətlərini istismar edəcəklər".
Politoloqun sözlərinə görə, Ukraynanın torpaqları yenə işğal altında qalacaq və ərazi bütövlüyü təmin edilməyən müqavilə imzaladılacaq:
"Bütün bunlar Ukrayna üçün təhlükəli ssenarilərdir. Belə olan şəraitdə müharibə səbəbindən Ukraynada qaçqın və didərgin düşmüş vətəndaşların yenidən ölkəyə qayıdıb-qayıtmayacağı isə sual altındadır. Ümumiyyətlə Kiyev növbəti plasdarma çevrilmiş olacaq".
