Fransa və Avropa ABŞ-ın Ukraynaya yardımını mümkün qədər əvəz etmək üçün bütün mümkün vasitələri birləşdirməlidir. Bu sözləri Fransa Baş naziri Fransua Bayru ABŞ-ın Ukraynaya hərbi yardımı dayandırmasını şərh edərkən deyib.
O vurğulayıb ki, Ukrayna hərbçilərinə döyüş sursatı, rabitə və kommunikasiyalara çıxış, həmçinin müəyyən sayda kəşfiyyat sistemləri lazımdır: “Bu, bizi modelimizi, prioritetlərimizi yenidən nəzərdən keçirməyə və bildiyimizi düşündüyümüz dünyaya fərqli gözlə baxmağa vadar edəcək. Biz aşkar etdik ki, bu dünya düşündüyümüzdən daha təhlükəlidir və bu təhlükə bizim müttəfiq hesab etdiyimiz şəxslərdən qaynaqlanır”.
Politoloq Kazım Kazımov “Sherg.az”a bildirib ki, Fransa Baş nazirinin sözləri həqiqəti əks etdirmir:
“Çünki vahid Avropa anlayışı mövcud deyil. Vahid Avropa anlayışı olsaydı hazırda bütün Avropa ölkələri Ukraynaya yardım göstərərdi. Lakin Macarıstan Ukraynaya yardımları blok edib, eyni zamanda Polşa kimi ölkələr sülhün imzalanmağının vacibliyini söyləyirlər. Böyük Britaniya və İngiltərənin Amerikanın maraqlarına qarşı çıxacağını düşünmürəm. Digər tərəfdən Avropanın yardımları Amerikanın dəstəyinin yerini heç vaxt tutmaz. Silah arsenalı baxımından ABŞ Avropadan qat-qat üstündür. Yəni Fransa və digər Avropa ölkələri Amerikanın Ulkraynaya olan maliyyə yardımını qarşılayacaq gücdə deyillər. Nəzərə almaq lazımdır ki, indiyə qədər Ukrayna və Amerika ordusu arasında dialoq mövcud idi. Bütün bunlardan sonra Avropa ilə əməkdaşlıq Ukrayna üçün yaxşı heç nə vəd etmir”.
