Rusiya Prezidenti Vladimir Putin ABŞ-a yeni səfir təyin edib.
Putin bu gün bu barədə fərman imzalayıb.
Rusiya Prezidenti Vladimir Putin Rusiya Xarici İşlər Nazirliyinin Şimali Atlantika Departamentinin direktoru Aleksandr Darçiyevi ABŞ-a səfir təyin edib.
Qeyd edək ki, ABŞ tərəfi Aleksandr Darçiyevin Rusiyanın bu ölkədəki səfiri vəzifəsinə təyin olunmasına dair aqreman verib.
Darçiyev hazırda Rusiya Xarici İşlər Nazirliyinin Şimali Atlantika Departamentinin direktoru vəzifəsində çalışır.
Politoloq Taleh Əliyev "Sherg.az"a söyləyib ki, ABŞ prezidenti Donald Trampın Ukrayna üzərində təzyiqi və Rusiyanın xeyrinə sülh müqaviləsinin imzalanması istiqamətində çağırışları istər-istəməz Moskva üçün yeni ümidlər yaradıb:
"Bu kontekstdə Rusiya prezidenti Vladimir Putinin məlum fərmanı da eyni məqsədə xidmət edir və Kremlin Ukrayna məsələsində öz mövqeyini möhkəmləndirmək cəhdlərinin tərkib hissəsidir. Lakin ABŞ-ın gələcək siyasətinin istiqamətini müəyyən edən tərəf Rusiya olmayacaq. Burada əsas amillərdən biri Avropa dövlətlərinin Ukrayna məsələsində nə dərəcədə prinsipial mövqe sərgiləməsidir. Əgər Avropa ölkələri bu məsələdə birlik nümayiş etdirib, ABŞ-ın Rusiya siyasətinə təsir edə bilsələr, Kremlin gözləntiləri doğrulmaya bilər.
Bu baxımdan, Tramp administrasiyasının mövcud mövqeyi və Rusiyaya yönəlik sülh təşəbbüsləri hər nə qədər rezonans doğursa da, onların real nəticələrə gətirib çıxaracağı hələ də sual altındadır. Avropa və ABŞ-ın vahid mövqedən çıxış etməsi, Rusiyanın regionda planlaşdırdığı mümkün dəyişikliklərə mane ola bilər. Bu səbəbdən də hazırkı təşəbbüslərin Ukrayna böhranının əsas axarını köklü şəkildə dəyişəcəyini düşünmək hələlik çətindir".
