ABŞ-nin Demokrat Partiyasından olan konqresmen Şri Tanedar Prezident Donald Trampın impiçmenti üçün qətnamə təqdim edib.
Oxu.Az-ın Gazeta.ru-ya istinadən xəbərinə görə, o, bununla bağlı "X" sosial şəbəkəsində video yerləşdirib.
"Mən Trampın impiçmenti ilə bağlı qətnamə təqdim etdim və burada impiçment haqqında yeddi maddə qeyd edilib", - deyə o bildirib.
Konqresmen sadalanan maddələr sırasında Tramp tərəfindən ədalət mühakiməsinə mane olunması, beynəlxalq təcavüz, qeyri-qanuni qurumların yaradılması, korrupsiya, həmçinin vəzifə səlahiyyətlərindən sui-istifadə edilməsi kimi halları qeyd edib.
Xatırladaq ki, daha əvvəl bildirildiyinə görə, ABŞ-də dövlət işçilərinin işə götürülməsində və ya işdən çıxarılmasında Donald Trampın siyasi kursuna əməl etməyə hazır olmaq əsas amil hesab ediləcək.
Bildirildiyinə görə, ABŞ agentlikləri bu ilin oktyabrın 1-dən yeni sistemə keçəcəklər. Kadr siyasətinə nəzarət Federal Kadrlar İdarəsi tərəfindən həyata keçiriləcək ki, bu da ABŞ hökuməti tərkibində müstəqil qurumdur.
