Azərbaycan Xarici İşlər Nazirliyi Milli Məclisin deputatı Azər Badamovun Moskva hava limanında saxlanmasına və Rusiyadan deportasiya edilməsinə münasibət bildirib.
Sherg.az xəbər verir ki, nazirliyin mətbuat katibi Ayxan Hacızadə hadisənin mayın 4-də baş verdiyini təsdiqləyib.
"Bəli, həqiqətən bu gün bu hadisə baş verib. Qeyd edək ki, Milli Məclisin üzvü Azər Badamovun daxil olduğu nümayəndə heyətinin Həştərxan şəhərinə səfəri məhz Rusiya Federasiyası Həştərxan vilayətinin vitse-qubernatoru - Hökümət sədri Denis Afanasyevin dəvəti əsasında Azərbaycan xalqının Ümummilli Lideri Heydər Əliyevin anadan olmasının 102-ci ildönümü münasibətilə keçiriləcək tədbirlərdə iştirak məqsədilə təşkil olunub", - XİN rəsmisi vurğulayıb.
O qeyd edib ki, nümayəndə heyəti Bakıdan Moskvaya uçmasına baxmayaraq, Rusiya tərəfi hər hansı bir ilkin xəbərdarlıq və ya məlumat vermədən heyətin tərkibində olan deputat Azər Badamovu Moskvada hava limanında saxlayaraq, onun ölkəyə girişinə qadağa qoyulduğunu bildirib: "O bir müddət Moskva hava limanında gözlədildikdən sonra, ölkəmizə geri qaytarılıb".
A.Hacızadənin sözlərinə görə, məsələ ilə əlaqədar, dərhal Azərbaycanın Rusiyadakı səfirliyi vasitəsilə Rusiya XİN-i ilə əlaqə saxlanılıb, Rusiya XİN-in rəsmisi məsələnin araşdırılacağını bildirərək, bu qərarın səbəbləri barədə izahat verməyib.
"Rusiya tərəfinin verdiyi bu qərarı qeyri-dost addım hesab edir, məsələ ilə əlaqədar Rusiya tərəfindən turarlı izahat veriləcəyini gözləyirik", - XİN mətbuat katibi bildirib.
