Ermənistanın müdafiə naziri Suren Papikyan Yunanıstana səfərə gedib.
Bu barədə adıçəkilən ölkənin Müdafiə Nazirliyi məlumat yayıb.
Onu səfərdə nazirliyin nümayəndə heyəti müşayiət edəcək.
Qeyd edək ki, hər iki ölkə 2023-cü ilin dekabrında hər iki qurum arasında hərbi-texniki əməkdaşlıq sazişi imzalanıb.
Politoloq Sahil Kərimli Sherg.az-a bildirib ki, Ermənistan-Yunanıstan yaxınlığı Cənubi Qafqazda sülhün və təhlükəsizliyin əldə olunmasına növbəti zərbə kimi qiymətləndirilməlidir:
"Çünki Yunanıstan daim Ermənistana yaxınlıq göstərərək, o cümlədən hərbi yardımları ilə bu məsələlərdə öz riyakar və ikiüzlü siyasətini nümayiş etdirir. Ümumiyyətlə İrəvan son dövrlərdə həm ABŞ, həm Avropa İttifaqı (Aİ), xüsusilə də Fransa və Hindistanla əlaqələri genişləndirərək öz hərbi potensialını gücləndirməyə çalışır. Həmçinin Yunanıstanla baş tutacaq növbəti danışıqlar və sövdələşmələr də onu deməyə əsas verir ki, Ermənistan sülh prosesini zədələməyə çalışır. Yəni sözügedən ölkələrin qarşılıqlı hərbi əməkdaşlığın həyata keçirilməsi və Yunanıstanın İrəvana dəstəyi Ermənistanın hərbi təxribatlara hazırlaşdığının göstəricisidir. Məhz Ermənistan Azərbaycana qarşı hücum planı və yeni müharibə niyyətindədir. Çünki İrəvan Bakı ilə sülh müqaviləsini imzalamaqdan boyun qaçırır, o cümlədən qeyri-konstruktiv mövqedən çıxış edir".
Politoloq vurğulayıb ki, Yunanıstan onsuz da Türkiyə və Azərbaycana qarşı qərəzli və düşmənçilik siyasəti yürüdüb:
"Bunun ən bariz nümunələrindən biri də Ermənistana verilən dəstəkdir. Yunanıstan-Ermənistan yaxınlaşması və hərbi sahədə əməkdaşlıqların dərinləşməsi Azərbaycana, ümumilikdə türk dünyasına qarşı yönəlmiş çirkin siyasətin bir hissəsidir".
