Avropa ölkələrinin müdafiə xərclərini artırması ABŞ-yə təhlükəsizlik strategiyasının əsas istiqamətlərindən biri olan Hind-Sakit okean regionuna daha çox diqqət ayırmağa imkan verəcək.
Teleqraf xəbər verir ki, bu barədə ABŞ müdafiə naziri Pit Heqset bildirib.
Nazirin sözlərinə görə, NATO üzvü olan ölkələr alyans çərçivəsində üzərlərinə düşən öhdəlikləri bərabər şəkildə yerinə yetirməlidirlər. Əks halda, NATO-nu "sarsılmaz ittifaq" adlandırmaq düzgün olmaz.
“Biz hesab edirik ki, Avropadakı NATO müttəfiqlərimiz qitədəki imkan və resurslarından maksimum istifadə etməlidirlər. ABŞ Prezidenti Donald Trampın səyləri nəticəsində bir çox Avropa ölkələri alyansdakı öhdəliklərini daha ciddi qəbul etməyə başlayıblar. Əgər müttəfiqlərimiz bu yükü bizimlə bölüşsələr, biz də öz diqqətimizi əsas prioritetlərimizdən biri olan Hind-Sakit okean regionuna yönəldə bilərik”, – o qeyd edib.
