Böyük Britaniya Xarici İşlər Nazirliyi Türkiyəyə səyahət etməyi planlaşdıran vətəndaşlar üçün səyahət tövsiyələrini yeniləyib və müxtəlif təhlükəsizlik xəbərdarlıqları edib.
Teleqraf xəbər verir ki, nazirlikdən verilən açıqlamada taksidən istifadə, kütləvi aksiyalar, saxta spirtli içki riski və şəxsiyyət vəsiqəsi daşıma öhdəliyi kimi məsələlərə xüsusi diqqət yetirilib.
Yenilənmiş rəsmi səyahət səhifəsində britaniyalı turistlərin Türkiyədə qarşılaşa biləcəyi potensial risklər təfərrüatlı şəkildə göstərilib.
Britaniya XİN xüsusilə lisenziyasız fəaliyyət göstərən taksilərin böyük təhlükəsizlik riski yarada biləcəyini qeyd edib: “Qeydiyyatı olmayan, sayğaclı və ya lisenziyasız avtomobillər təhlükəsizlik üçün ciddi təhdidlər yarada bilər”.
Səlahiyyətlilər turistlərə otellər və ya etibarlı mobil proqramlar vasitəsilə taksi çağırmağı tövsiyə edib.
Qurum Türkiyənin bəzi bölgələrində zaman-zaman keçirilən etirazların zamanla zorakılığa çevrilə biləcəyini iddia edib. Xüsusilə İstanbul və Ankara kimi böyük şəhərlərdə ictimai-sosial hadisələrin daha intensiv olduğu qeyd olunub və polisin bu cür aksiyalara gözyaşardıcı qaz və təzyiqli su ilə müdaxilə etdiyi xatırladılıb.
“Nümayişlərin keçirildiyi ərazilərdən uzaq durun. Mümkün bir fəallıq zamanı ərazini tez tərk edin”, - bəyanatda vurğulanıb.
Türkiyədə son illərdə saxta içkidən ölüm hallarının artdığını qeyd edən Böyük Britaniya Xarici İşlər Nazirliyi turistlərin bu mövzuda diqqətli olması lazım olduğunu vurğulayıb. Açıqlamada spirtli içkilərin yalnız lisenziyalı müəssisələrdən alınmalı olduğu, xüsusən də küçə satıcılarından və ya naməlum mənbələrdən alınan məhsulların ciddi sağlamlıq riski yaratdığı bildirilib.
Nazirlik Türkiyədə fotoşəkilli şəxsiyyət vəsiqəsi daşımamağın qanuna zidd olduğunu xatırladıb və turistləri pasport və ya yaşayış icazələrini daşımağa çağırıb. Xüsusilə İstanbul kimi izdihamlı şəhərlərdə təhlükəsizlik yoxlamalarının geniş vüsət aldığı və polis yoxlamalarına qarşı əməkdaşlıq edilməli olduğu qeyd edilib.
