Kənd ərazilərində yaşayanlar və yay səyahətçiləri, diqqətli olun!
Gənə dişləmələri xüsusilə yaz və yay aylarında təbiətdə vaxt keçirənlərdə, kənd təsərrüfatı və heyvandarlıqla məşğul olan şəxslərdə tez-tez müşahidə olunur.
“Şərq” qəzeti “hürriyet.com”a istinadən xəbər verir ki, bəzi gənələr ciddi və ölümcül olan Krım-Konqo Qanamalı Qızdırması (KKQ) xəstəliyinə səbəb olan virusu daşıyır. Dermatoloq-mütəxəssis Sertaç Sever yay aylarında artan gənə dişləmələri və KKQ ilə bağlı vacib məlumatlar verib, gənələrin daşıdığı bu ölümcül xəstəlikdən qorunma yollarını və simptomlara qarşı görülməli tədbirləri izah edib: “Türkiyədə Tokat, Sivas, Çorum, Amasya, Yozgat, Erzurum, Erzincan, Gümüşhane və Kastamonu vilayətləri KKQ hallarının daha çox rast gəlinən bölgələridir. Əsas risk qrupunu kənd əhalisi, xüsusən də əkinçilik və maldarlıqla məşğul olanlar təşkil edir.
KKQ-nin əsas əlamətləri qəfil başlayan qızdırma, baş və əzələ ağrıları, halsızlıq və ürəkbulanmadır. Ancaq xəstəlik irəlilədikcə daxili və xarici qanamalar da müşahidə oluna bilər. Xəstəliyin erkən diaqnozu və tez tibbi müdaxilə gedişatı əhəmiyyətli dərəcədə yaxşılaşdırır və həyat qurtara bilər.
Gənələrdən qorunmaq üçün kənd ərazilərində olarkən uzunqollu, açıq rəngli geyimlərə üstünlük verilməli, şalvar ətəkləri corabın içinə salınmalı və bədən gənələrə qarşı mütəmadi yoxlanmalıdır. Əgər gənə aşkar edilərsə, ona çılpaq əllə toxunmadan, uyğun üsulla çıxarılmalı və şəxs dərhal tibb müəssisəsinə müraciət etməlidir. Gənə sancmasından sonra bir neçə gün ərzində qızdırma, halsızlıq və ya qripəbənzər simptomlar yaranarsa, vaxt itirmədən həkimə müraciət etmək çox vacibdir. Erkən məlumatlılıq və düzgün müdaxilə Krım-Konqo Qanamalı Qızdırması xəstəliyindən qorunmanın ən effektiv yoludur. Özünüzü və yaxınlarınızı qorumaq üçün sadə ehtiyat tədbirlərinə əməl etməyi unutmayın”.
