Son illər Azərbaycan və Ermənistan arasında sülhün əldə olunması məsələsi gündəmdədir. 2020-ci ildə baş verən müharibədən sonra vəziyyət dəyişib və hər iki tərəf sülhə daha çox yaxınlaşıb. Ermənistanın baş naziri Nikol Paşinyan da artıq sülh istədiyini açıq şəkildə bildirir. Azərbaycan da haqlı mövqeyini qoruyaraq sülhə hazır olduğunu söyləyir. Lakin Ermənistanda sülh prosesinə qarşı çıxan güclər öz mövqelərini qorumağa çalışırlar.
Beynəlxalq Münasibətlərin Təhlili Mərkəzinin İdarə Heyətinin sədri Fərid Şəfiyev mövzu ilə bağlı Sherg.az-a açıqlama verib:
"İndiki mərhələdə Ermənistanın qeyri-səmimi olduğuna inanmıram. Nikol Paşinyanın hazırki bütün siyasi platforması sülh üstündə qurulub. Ona görə də onu ittiham edən 3 əsas qüvvə-kilsə, müxalifət və radikal diasporadır. Ermənistan baş naziri həqiqətən də istəyir ki, sülh sazişi imzalansın.
Gələn il Ermənistanda seçkilər keçiriləcək. Əgər seçkilərə qədər sülh olmasa Paşinyan üçün çətin olacaq. Çünki onun üçün son illər vacib olan əsas məsələlər sülh sazişi və Türkiyə, Azərbaycanla əlaqələrin normallaşdırılmasıdır. Bunlar da erməni əhalisi üçün qəbul olunan məsələlərdir.
Biz öz haqlı tələblərimizi irəli sürürük, Qarabağ Azərbaycandır deyirik. Lakin unutmamalıyıq ki, Paşinyan 2019-cu ilin avqust ayının 5-də demişdi ki, Qarabağ Ermənistandır".
Fərid Şəfiyev Azərbaycanın sülh gündəliyini formalaşdırdığını söyləyib. Qeyd edib ki, Paşinyan bir sıra səbəblərə görə buna razı olsa da, hazırda o da sülhü istəyir.
