Xarici Əlaqələr Komitəsinin düzəlişi sülh prosesinə zərbədir
ABŞ Konqresinin Nümayəndələr Palatasının Xarici Əlaqələr Komitəsində Azərbaycan əleyhinə təxribatçı düzəliş qəbul olunub. Bu barədə Amerika Erməniləri Milli Komitəsi (ANCA) məlumat yayıb. Söhbət ermənipərəst konqresmen Qabe Amonun rəhbərlik etdiyi və ANCA-nın dəstəyi ilə qəbul olunmuş "Dövlət Departamentinin mandatına düzəliş"dən gedir. Təxribatçı layihə Bakıda həbsdə olan erməniəsilli hərbi cinayətkarların sərbəst buraxılmasını, Azərbaycanın Qarabağ iqtisadi rayonundan könüllü getmiş ermənilərin qaytarılmasını və burada "erməni mədəni obyektlərinin qorunması"nı nəzərdə tutur. ABŞ Konqresinin Nümayəndələr Palatasının ermənipərəst üzvü Bred Şerman da bundan əvvəl ABŞ Beynəlxalq Maliyyə Korporasiyasının (IDFC) Türkiyə və Azərbaycana yardıma mane olmağı nəzərdə tutan düzəliş təqdim etmişdi.
Politoloq Məhəmməd Əsədullazadə Sherg.az-a deyib ki, ABŞ Nümayəndələr Palatası erməni lobbisinin təsirindədir. Ekspert vurğulayıb ki, ABŞ Nümayəndələr Palatasının xarici əlaqələr komitəsində erməni lobbisinin dəstəyi ilə Azərbaycan əleyhinə düzəliş qəbul olunması Prezident Donald Trampın siyasi xəttinə ziddir:
"Azərbaycanla Ermənistan arasında sülh mətninin paraflanması, ABŞ-nin prosesdə vasitəçi olması, Zəngəzur dəhlizinin açılmasının razılaşdırılması fonunda belə bir düzəlişin edilməsi Rusiyanın maraqlarına xidmət edir. Xarici əlaqələr komitəsində qəbul edilən düzəliş Azərbaycanla Ermənistan arasında sülh prosesinə zərbə vurmaq mahiyyəti daşıyır. Ümumiyyətlə, bu düzəlişin Azərbaycan üçün heç bir siyasi və hüquqi qüvvəsi yoxdur. Bu, Azərbaycanın daxili işinə qarışmaqdır. Ermənistan Baş naziri Nikol Paşinyan Qarabağdan köçən ermənilərin geri dönüşünün mümkün olmadığını və onlara Ermənistan vətəndaşlığı veriləcəyini qeyd edib. Separatçı "liderlərin" həbsi isə Azərbaycanın daxili işidir. ABŞ Nümayəndələr palatası hüquqi ədalət axtarırsa, İsrailin Qəzzada həyata keçirdiyi humanitar böhranla bağlı qərar qəbul etməlidir. Nümayəndələr Palatası sifarişlə qərarlar qəbul edir".
