Fələstinin HƏMAS hərəkatı 12 oktyabrda 20 girovu İsrailə təhvil verməyə hazırdır.
Teleqraf xəbər verir ki, bu barədə “The Wall Street Journal” (WSJ) nəşri məlumat yayıb.
Lakin bildirilib ki,bu tarix bir qədər təxirə salına bilər. Məlumata əsasən, HƏMAS İsrailə bu barədə məlumatı ərəb vasitəçiləri üzərindən göndərib. Hərəkat ilk dəfə olaraq özündə 20 israillinin girov saxlandığını da təsdiqləyib.
İsrail ordusu girovların bazar günü axşam təhvil alınmasına hazırlaşır. Bununla belə, mənbələrin bildirdiyinə görə, proses 13 oktyabra (ABŞ prezidenti Donald Trampın İsrail və Misirə səfəri ilə eyni vaxta) təsadüf edə bilər. İsrailin qiymətləndirməsinə əsasən, hazırda Qəzza zolağında 20-yə qədər israilli girov və təxminən 28 nəfərin cəsədi qalır.
HƏMAS bəyan edib ki, bəzi girovların cəsədlərinin yerini bilmir və Trampın planında nəzərdə tutulan 72 saatlıq müddətə əməl etməkdə çətinlik çəkə bilər. İsrail tərəfi də axtarışların daha uzun çəkə biləcəyini etiraf edib.
“The Wall Street Journal”ın məlumatına görə, Qəzzə zolağında israilli girovların cəsədlərini axtarmaq üçün Misir, Qətər, ABŞ və Türkiyənin iştirakı ilə beynəlxalq birgə qrup yaradılır.
