ABŞ müttəfiqlərinə xəbərdarlıq edib ki, ölkə tükənmiş sursat ehtiyatlarını bərpa etdiyi üçün əsas silahların tədarükündə beş ilə qədər gecikmələr ola bilər.
Teleqraf xəbər verir ki, bu barədə "Bloomberg" öz mənbələrinə istinadən məlumat yayıb.
Rəsmilərin sözlərinə görə, bir sıra Avropa ölkələri ABŞ-la İran arasındakı müharibə zamanı öz arsenalını azaltdığından vacib raket sistemlərinin və hava hücumundan müdafiə sistemlərinin çatdırılmasında gecikmələr olduğunu bildirir.
Xüsusilə, Almaniya Vaşinqtondan uzun mənzilli "Tomahawk" qanadlı raketlərinin və "Typhon" yerüstü buraxılış qurğularının çatdırılmasını sürətləndirməsini istəyib. Lakin raket çatışmazlığı səbəbindən "RTX Corp."un bir hissəsi olan onların istehsalçısı "Raytheon"un Almaniya sifarişini beş il ərzində yerinə yetirə bilməsi ehtimalı azdır.
İki rəsminin sözlərinə görə, Amerika silah sistemlərindən istifadə edən bəzi Şərqi Avropa ölkələri də ABŞ-İsrail müharibəsinin başlamasından qısa müddət sonra təchizatda gecikmələrlə üzləşiblər.
Pentaqonun öz ehtiyatlarının artırılmasına üstünlük vermək qərarı, çətin qışdan əvvəl Ukraynanın ABŞ-dən Patriot hava hücumundan müdafiə sistemləri üçün əlavə tutucu raketlər almaq səylərini də çətinləşdirir.
Qeyd olunur ki, Ukraynanın çox ehtiyac duyduğu hava hücumundan müdafiə avadanlığı məsələsi gələn həftə Nyu-Yorkda keçiriləcək BMT iclaslarında əsas mövzulardan biri olacaq.
