Çin ABŞ, Yaponiya və Cənubi Koreyanın xarici siyasət idarələri rəhbərlərinin Tayvan və Cənubi Çin dənizi ilə bağlı söylədiyi məsuliyyətsiz açıqlamaları qətiyyətlə pisləyir və rədd edir.
AZƏRTAC xəbər verir ki, Çin Xarici İşlər Nazirliyinin sözçüsü Quo Ciakun Pekində keçirdiyi mətbuat konfransında BMT Baş Assambleyasının 80-ci sessiyası çərçivəsində Nyu-Yorkda keçirilmiş üçtərəfli görüşün yekun bəyanatını şərh edərkən deyib.
"Birləşmiş Ştatlar, Yaponiya və Cənubi Koreya Tayvan və Cənubi Çin dənizi ilə bağlı məsələlərdə məsuliyyətsiz açıqlamalar verib, Çinin daxili işlərinə qarışıb, Çinə böhtan atıb və ləkələməyə çalışıb. Çin bunu qəti şəkildə pisləyir və qətiyyətlə rədd edir”, - deyən Quo Ciakun əlavə edib ki, Tayvan Çinin ayrılmaz hissəsidir və Tayvan məsələsi Çinin daxili işidir, xarici müdaxilə yolverilməzdir.
Çinin XİN rəsmisi bildirib ki, Tayvan boğazı boyunca sülh və sabitliyə ən böyük təhlükə Tayvandakı separatçı fəaliyyətlərdən və ona xarici dəstəkdən qaynaqlanır.
Quo Ciakun üçtərəfli bəyanatda Cənubi Çin dənizi ilə bağlı fikirlərə cavab olaraq belə deyib: “Hazırda Cənubi Çin dənizində vəziyyət ümumən sabitdir. Çin həmişə öz ərazi suverenliyini, dəniz hüquqlarını və maraqlarını qorumağa, fikir ayrılıqlarını dialoq və məsləhətləşmələr yolu ilə həll etməyə sadiqdir”.
Qeyd edək ki, ABŞ, Yaponiya və Cənubi Koreyanın XİN rəhbərlərinin görüşünün yekununa dair bəyanatda tərəflər "Cənubi Çin dənizində qeyri-qanuni dəniz iddialarına" qarşı olduqlarını vurğulayıblar. Bəyanatda, həmçinin Tayvan boğazı ətrafında tez-tez sabitliyi pozan hərəkətlərdən narahatlıq ifadə olunub, status-kvonu birtərəfli qaydada dəyişdirmək cəhdləri qınanıb.
