S.A. adlı Ermənistan vətəndaşı Baş nazir Nikol Paşinyan və keçmiş həyat yoldaşı Anna Akopyanı daşıyan təyyarənin PUA ilə vurulmasına çağırış edib.
Teleqraf xəbər verir ki, bu barədə Ermənistan hüquq-mühafizə orqanlarından yerli KİV-ə bildirilib.
2025-ci ilin dekabrında Feysbukda edilən bir paylaşımda Rusiyaya səfər edən Nikol Paşinyanın təyyarəsinin Moskvada eniş edə bilməməsinə toxunulub. Həmin paylaşımın şərhlər bölməsində S.A. bu məzmunda şərh yazıb: “Kaş dronla vurulardı, hamımız o iki yırtıcıdan xilas olardıq”.
Bu şərhdən sonra Ermənistan İstintaq Komitəsinin Geqarkunik regional idarəsi Cinayət Məcəlləsinin müvafiq maddələri üzrə (“Kütləvi informasiya vasitələri və ya informasiya-kommunikasiya texnologiyaları vasitəsilə zorakılığa açıq çağırış”, “Zorakılığın ictimai şəkildə əsaslandırılması və ya təbliği”) cinayət işi açıb.
İşin başlanmasından təxminən 3 ay sonra S.A.-ya bu maddələr üzrə ittiham irəli sürülüb. Şübhəli barəsində qətimkan tədbiri kimi ölkədən çıxışına qadağa seçilib.
