Salvador Prezidenti Nayib Bukele şənbə günü Qanunvericilik Assambleyasından (birpalatalı parlament) cinayətkar qrupların fəaliyyəti ilə bağlı, qətllərin sayının artması ilə əlaqədar ölkədə fövqəladə vəziyyət elan edilməsini istəyib.
Bu barədə “Report” TASS-a istinadən xəbər verir.
“Bu gün Qanunvericilik Assambleyasından respublika konstitusiyasının 29-cu maddəsinə uyğun olaraq fövqəladə vəziyyət elan edilməsi haqqında fərmanı dəstəkləməyi xahiş edirəm”, - dövlət başçısı tviter səhifəsində yazıb.
Yerli “La Prensa Gráfica” qəzetinin yazdığına görə, Salvadorda şənbə günü 57 qətl hadisəsi qeydə alınıb ki, bu da son 20 ilin ən yüksək gündəlik qətl göstəricisidir.
Salvador Konstitusiyasına görə, müharibə, ölkə ərazisinə təcavüz, üsyan, qiyam, fəlakət, epidemiya, digər böyük fəlakət və ya ictimai asayişin ciddi şəkildə pozulması zamanı sərbəst toplaşmaq azadlığı, ölkəyə giriş-çıxış azadlığı, yazışmaların toxunulmazlığı, məhkəmənin qərarı olmadan telekommunikasiyaların işinə müdaxilənin qadağan edilməsi dayandırıla və ya məhdudlaşdırıla bilər.
