Paris görüşü Avropanın təhlükəsizliyi, gələcəyi və Ukrayna müharibəsinin gələcəyini müəyyənləşdirəcək
Ukrayna Prezident Ofisinin rəhbəri Andrey Yermak, xarici işlər naziri Andrey Sibiqa və müdafiə naziri Rustem Umerov Parisə gediblər.
Bu barədə Andrey Yermak özünün Telegram kanalında bildirib.
Onun sözlərinə görə, səfər çərçivəsində “Arzuedənlər Koalisiyası” və təhlükəsizliyi təmin etməyə hazır olan dövlətlər, xüsusən, Fransa, Almaniya və Böyük Britaniyanın nümayəndələri ilə bir sıra ikitərəfli və çoxtərəfli görüşlərin keçirilməsi planlaşdırılıb.
Hazırda Fransada səfərdə olan ABŞ nümayəndələri ilə də görüşlər nəzərdə tutulub.
“Bütün Avropanın və Ukraynanın təhlükəsizliyi üçün vacib məsələlər üzərində çalışırıq”, - Yermak əlavə edib.
Ukrayna Xarici İşlər Nazirliyi də nümayəndə heyətinin təhlükəsizlik və davamlı sülhlə bağlı məsləhətləşmələr üçün Parisə səfər etdiyini bildirib.
XİN ukraynalı məmurların ABŞ nümayəndələri ilə görüşlər planlaşdırdığını təsdiqləyib.
Qeyd edək ki, ABŞ Dövlət katibi Marko Rubio və Prezident Donald Trampın xüsusi nümayəndəsi Stiv Uitkoff da Parisdə səfərdədir.
Politoloq Natiq Miri "Sherg.az"a deyib ki, sözügedən görüşün əsas məqsədlərindən biri ABŞ-Rusiya danışıqlarından sonra yaranan vəziyyətlə bağlıdır:
"Çünki Parisə təkcə Ukrayna və Avropa üzrə müttəfiqlər deyil, eyni zamanda ABŞ-nin dövlət katibi Marko Rubionu və Rusiyada danışıqlar aparan Uitkoff da gedib. Putinlə olan söhbətlər və onun tələbləri Vaşinqton, Brüssel və Kiyev arasında ciddi müzakirə predmeti olacaq. Ona görə ki, ABŞ birtərəfli qaydada Ukraynanın güzəştə getməsi ilə müharibənin bitməsində maraqlıdır. Çünki Donald Tramp üçün əsas hədəf münaqişəsinin başa çatması yox, Çindir. Bu baxımdan müharibənin bitməsinə ehtiyac var ki, Rusiya normal səviyyədə ayaqda dura bilsin. Nəticədə ABŞ onu öz yanına çəkməklə Çinin təklənməsinə nail olsun. Bunu Avropa Birliyi (AB) və Ukrayna da çox gözəl başa düşür. Eyni zamanda təkcə Ukraynanın deyil, Avropanın da təhlükəsizlik məsələsi də çox ciddi gündəm olaraq ortaya çıxıb. Ukrayna Rusiya tərəfindən tamamilə məhv edilərsə, Putin bununla dayanmayacaq. Bunların hər biri görüşdə müzakirə olunacaq. İlk növbədə Kiyevin, o cümlədən Avropanın maraqlarına uyğun tələblər ABŞ-nin qarşısına qoyulacaq. Vaşinqton Moskva ilə danışıqlarda bütün bunları mütləq nəzərə almalıdır. Əks təqdirdə ABŞ-a anladılacaq ki, sülh məsələsi baş tutmayacaq və müharibə davam edəcək. Bu isə Trampın ən böyük fiyaskosu olacaq".
Politoloqun sözlərinə görə, Parisdəki görüşdə o qədər də ciddi qərarların qəbul edilməsi gözlənilmir:
"Ümumiyyətlə Rusiya-Ukrayna müharibəsi ilə bağlı ortaq konkret nəticəyə gəlinməsə, atəşkəs olmayacaq. Bu mənada Paris görüşü Avropanın təhlükəsizliyi, gələcəyi və Ukrayna müharibəsinin gələcəyini müəyyənləşdirəcək".
