Ukrayna yaxın günlərdə ABŞ-dan "Patriot" sistemləri üçün yeni anti-ballistik raket paketi alacaq.
Teleqraf xəbər verir ki, bu barədə Ukrayna Prezidenti Volodimir Zelenski bildirib.
Zelenskinin sözlərinə görə, müvafiq razılaşmalar NATO sammiti zamanı əldə edilib. O qeyd edib ki, Amerika paketinin yaxın günlərdə çatdırılması gözlənilir.
Bundan əlavə, Ukrayna prezidenti bir sıra Avropa ölkələri ilə əldə edilən razılaşmalar barədə məlumat verib. Təchizatların dəqiq tarixləri hələ müəyyən edilməsə də, onun sözlərinə görə, Ukrayna həmçinin "Patriot" sistemləri üçün əlavə PAC-3 raketləri alacaq.
Tutucu raketlərin olmaması Ukrayna hava hücumundan müdafiə sisteminin əsas problemlərindən biri olaraq qalır. Daha əvvəl Ukrayna müdafiə nazirinin müşaviri Sergey Beskrestnov ölkədə ballistik hədəfləri tutmaq üçün demək olar ki, heç bir raket qalmadığını bildirmişdi.
ABŞ prezidenti Donald Tramp iyulun 8-də Vaşinqtonun Ukraynaya "Patriot" raket sistemlərinin istehsalı üçün lisenziya verəcəyini açıqlayıb.
