NATO-nun hərbi strategiyası Avropanın təhlükəsizliyini təmin etmir.
Teleqraf xəbər verir ki, Çinin nüfuzlu "Global Times" nəşri NATO-nun Haaqa sammitindən sonra yayımladığı redaksiya məqaləsində alyansın artan hərbi ekspansiyası və müdafiə xərclərinin kəskin yüksəldilməsini tənqid edib.
Məqalədə bildirilir ki, bu addımlar Avropanın təhlükəsizliyini təmin etmək əvəzinə, regionda qeyri-sabitliyi dərinləşdirir. Ukrayna böhranı isə bu siyasətin fəsadlarına bariz nümunə kimi göstərilir.
NATO liderlərinin qəbul etdiyi yekun bəyanatda müdafiə xərclərinin ÜDM-in 5 faizinə qədər artırılması ilə bağlı razılıq əldə olunub. Nəşr yazır ki, bu təşəbbüs ABŞ tərəfindən ilin əvvəlində irəli sürüldükdə Avropa ölkələrinin əksəriyyətində ciddi narahatlıq doğurmuşdu. İndi isə bu planın NATO səviyyəsində qəbul edilməsi alyans daxilindəki ziddiyyətləri və təzyiq mexanizmlərini üzə çıxarır.
Nəşr NATO-nun yeni baş katibi Mark Rutte-ni də sərt tənqid edib. Məqalədə Rutte Vaşinqtonun maraqlarına xidmət edən sadiq təbliğatçı kimi xarakterizə olunub. Bildirilir ki, o, əvvəl Rusiya təhlükəsi daha sonra isə Çin təhdidi ritorikasından istifadə edərək Avropa ölkələrini daha çox hərbi xərclərə və ABŞ-ın geosiyasi planlarına uyğun hərəkət etməyə yönəltməyə çalışıb.
