"Qarabağ" bütün futbolçularını cərimələyib.
Axar.az Sportinfo.az-a istinadla xəbər verir ki, bu, Qurban Qurbanovun qərarıdır.
Baş məşqçinin belə addım atmasına səbəb Çempionlar Liqasının Liqa mərhələsinin üçüncü turunda qeydə alınan nəticədir. Belə ki, Azərbaycan təmsilçisi İspaniya səfərində "Atletik Bilbao" ilə üz-üzə gəlib. Ağdam klubu "San Mames" stadionunda keçirilən oyunu 1:3 hesabı ilə uduzub. Bu onların ardıcıl 2 qələbədən sonra liqa mərhələsində ilk məğlubiyyəti olub.
Qurbanovu məyus edən yalnız nəticə deyil. Təcrübəli mütəxəssisi narazı salan futbolçularının sərgilədiyi mübarizədir. O, istənilən səviyyədə çıxış etməmələri, əksər tapşırıqlarının yerinə yetirilməməsi üzündən oyunçularını cərimələməyi zəruri sayıb.
Məbləğ kifayət qədər böyükdür. Həmin vəsait komanda üzvlərinin oktyabr ayı üçün maaş fondundan tutulacaq.
"Qarabağ" bundan əvvəl keçirdiyi hər iki görüşdə qalib gəlmiş, "Atletik Bilbao" isə xal qazanmamışdı.
İlk turda "Benfika"nı 3:2, ikinci turda isə "Kopenhagen"i 2:0 üstələmiş Qurban Qurbanovun komandası hazırda sıralamada 6 xalla 13-cüdür.
ÇL-in Liqa mərhələsində ilk 8 yeri tutan komanda birbaşa 1/8 finala, 9-24-cü yerləri tutanlar isə pley-off mərhələsinə vəsiqə qazanır. 25-36-cı yeri tutanlar avrokuboklarda çıxışlarını başa vururlar.
