Ölkəmizdə siqaret çəkən qadınların sayı artmaqdadır. Bununla bağlı ötənlərdə Azərbaycan Tibb Universitetinin professoru Əlizamin Sadıqov məlumat verib.
Professorun sözlərinə görə, son illər dünyada qadınlar arasında nisbətən zəif də olsa siqaret çəkmə əmsalı azalırsa, Azərbaycanda bunun əksidir:
“20-30 il əvvəl Azərbaycanda qadınlar bu qədər siqaret çəkmirdilər, indi daha intensiv çəkirlər. Qadının siqaret çəkməyi yolverilməzdir. Ən azından o səbəbdən ki, siqaret onların sağlamlığında böyük problemlər yaradacaq”.
Həkim Şəmsiyyə Namazlı “Sherg.az”a açıqlamasında qeyd edib ki, siqaret dövriyyəyə buraxıldığı ilk gündən həmişə insanların sağlamlığına ziyanlı olub:
“Siqaretin orqanizmə o dərəcədə mənfi təsiri var ki, hətta onu satan şirkətlər belə üzərində yazırlar ki, sağlamlıq üçün zərərlidir. Siqaret xüsusilə də ürək-damar sisteminə mənfi təsir göstərir. Kişi ya qadın fərqi yoxdur, siqaretin hər iki orqanizmə təsir mexanizmi eynidir. Siqaretin tərkibində olan nikotin maddəsi ürəyin qidalanmasını zəiflədir, ağciyər xərçənginin yaranmasına səbəb olur. Araşdırmalara görə, hər dəfə 1 ədəd siqaret çəkdikdən sonra insan bədənində olan bütün damarlar 20 dəqiqə tıxanır. Elə adamlar var ki, gün ərzində 2-3 qutu siqaret istifadə edirlər. Hər siqareti 20 dəqiqədən hesablasaq, görün insan orqanizminə il ərzində nə qədər ziyan vurulur. Ona görə də tütündən istifadə insan həyatı üçün böyük risk faktorudur”.
Ş.Namazlı siqaretin qadınlar üçün daha təhlükəli olduğunu vurğuladı:
“Çünki qadın ana və daşıyıcıdır, o dünyaya körpə gətirir. Qadın siqaretdən istifadə edirsə, artıq ikinci insanın həyatını da təhlükə qarşısına qoyur. Belə məqamda yeni doğulacaq körpəyə vurulan zərbələr olduqca ciddir.
Məlumdur ki, siqaretdən istifadə estetik cəhətdən də yaxşı hal deyil. Çünki dişlərin rənginin saralması, dərinin müəyyən ciddi ziyanlara məruz qalması baş verir. Bəzən cavan şəxslər siqaretin qəbulunu dəb halı kimi qəbul edirlər. Təəssüf ki, siqaretdən istifadə azalmaq yerinə getdikcə artmaqdadır”.
