Asim Mollazadə:“Bununla da Azərbaycan beynəlxalq arenada özünə dəstək yaradır"
Samir Hümbətov:Ölkə başçısının Serbiya səfəri Azərbaycan qazının yaxın gələcəkdə Avropanın əksər dövlətinə ötürülməsi məqsədi daşıyır”
Noyabrın 23-də Azərbaycan Respublikasının Prezidenti İlham Əliyev Serbiya Respublikasına rəsmi səfərə gedib. Belqrad şəhərinin “Nikola Tesla” hava limanında Azərbaycan Prezidentinin şərəfinə fəxri qarovul dəstəsi düzülüb. Dövlətimizin başçısını Serbiya Respublikasının Prezidenti Aleksandar Vuçiç qarşılayıb. İki ölkə başçısı arasında geniş tərkibli görüş keçirilib.
Prezidenti İlham Əliyevin Serbiya Respublikasının Prezidenti Aleksandar Vuçiç ilə geniş tərkibdə görüşü başa çatdıqdan sonra sənədlərin imzalanması mərasimi olub.
Qeyd olunub ki, Azərbaycan Respublikasının Prezidenti İlham Əliyev və Serbiya Respublikasının Prezidenti Aleksandar Vuçiç “Azərbaycan Respublikası Prezidenti ilə Serbiya Respublikası Prezidenti arasında Birgə Bəyanat”ı, “Azərbaycan Respublikası və Serbiya Respublikası arasında Strateji Tərəfdaşlıq Şurasının yaradılması haqqında Memorandum”u və onun əlavəsi olan “Azərbaycan Respublikası və Serbiya Respublikası arasında Strateji Tərəfdaşlıq Şurasının Əsasnaməsi”ni imzalayıblar.
“Azərbaycan Respublikası Hökuməti ilə Serbiya Respublikası Hökuməti arasında readmissiya haqqında Saziş”i Azərbaycan Respublikasının daxili işlər naziri Vilayət Eyvazov və Serbiya Respublikasının daxili işlər naziri Bratislav Qaşiç imzalayıblar.
“Azərbaycan Respublikasının Rəqəmsal İnkişaf və Nəqliyyat Nazirliyi ilə Serbiya Respublikasının Tikinti, Nəqliyyat və İnfrastruktur Nazirliyi arasında “Dənizçilərin hazırlanmasına, onlara diplom verilməsinə və növbə çəkməyə dair 1978-ci il tarixli Beynəlxalq Konvensiya”nın sertifikatlarının tanınması haqqında Anlaşma Memorandumu”nu Azərbaycan Respublikasının rəqəmsal inkişaf və nəqliyyat naziri Rəşad Nəbiyev və Serbiyanın tikinti, nəqliyyat və infrastruktur naziri Qoran Vesiç imzalayıblar.
“Azərbaycan Respublikası Hökuməti ilə Serbiya Respublikası Hökuməti arasında sosial təminat haqqında Saziş”in tətbiqinə dair Azərbaycan Respublikasının Əmək və Əhalinin Sosial Müdafiəsi Nazirliyi ilə Serbiya Respublikasının Əmək, Məşğulluq, Veteranlar və Sosial İşlər Nazirliyi arasında İnzibati Razılaşma”nı Azərbaycan Respublikasının əmək və əhalinin sosial müdafiəsi naziri Sahil Babayev və Serbiya Respublikasının əmək, məşğulluq, veteran və sosial məsələlər naziri Nikola Selakoviç imzalayıblar.
“Azərbaycan Respublikasının Kiçik və Orta Biznesin İnkişafı Agentliyi ilə Serbiya Respublikasının Serbiya İnkişaf Agentliyi arasında Anlaşma Memorandumu”nu Azərbaycan Respublikasının Serbiya Respublikasındakı səfiri Kamil Xasiyev və Serbiya İnkişaf Agentliyinin direktoru Radoş Qazdiç imzalayıblar.
“Azərbaycan Respublikasının İxracın və İnvestisiyaların Təşviqi Agentliyi – AZPROMO ilə Serbiyanın Ticarət və Sənaye Palatası arasında Anlaşma Memorandumu”nu Azərbaycan Respublikasının Serbiya Respublikasındakı səfiri Kamil Xasiyev və Serbiyanın Ticarət və Sənaye Palatasının vitse-prezidenti Mixaylo Vesoviç imzalayıblar.
Səfəri “Sherg.az”a dəyərləndirən millət vəkili Asim Mollazadə bildirib ki, ölkə başçısı bu səfərlərlə Azərbaycana dost və tərəfdaş qazandırır:
"Ümumiyyətlə, prezidentin bütün səfərlərinin məqsədi ikitərəfli münasibətləri və əməkdaşlığı gücləndirməkdir. Bununla da Azərbaycan beynəlxalq arenada özünə dəstək yaradır".
Səfərin mahiyətindən danışan “Beynəlxalq Münasibətlər və Diplomatiya Araşdırmaları” Mərkəzinin sədri, politoloq Samir Hümbətov isə deyib ki, Serbiyanın Avropaya çıxış imkanları geniş olduğu üçün hər iki ölkə arasında əlaqələrin inkişaf etdirilməsi önəmlidir:
“Prezident İlham Əliyev Bolqarıstan və Yunanıstanda qaz xəttinin açılışını müzakirə edən zaman Serbiya prezidenti də orada idi. Burada iştirakın əsas səbəbi isə növbəti dövrdə Azərbaycan qazının Avropaya şaxələnmiş formada çıxarılması zamanı Serbiyaya da bu qazın ötürülməsi imkanlarının genişlənməsi idi. Düşünürəm ki, ölkə başçısının indiki məqamda Serbiya səfəri də, Azərbaycan qazının yaxın gələcəkdə şaxələndirilmə imkanlarının formalaşdırılması və Avropanın əksər dövlətinə bu qazın ötürülməsi məqsədi daşıyır. Digər tərəfdən Serbiya Avropanın Balkan yarımadasında daha böyük nüfuza malik dövlətlərdən biridir. Nəzərə almalıyıq ki, Rusiya-Ukrayna savaşı davam edir və sanksiyalara görə Kremlin Avropaya ötürəcəyi enerji miqdarı azalır. Eyni zamanda tranzit imkanlar müzakirə olunur. Yəni Azərbaycan üzərindən Türkiyə, Yunanıstan və oradan da Balkanlara çıxan bir dəmir yolu xətti var. Əsas hədəf isə həmin xəttin genişləndirilməsi məsələsidir. Bu səfərdə həm də siyasi, iqtisadi, təhlükəsizlik və mədəni sahələrdə razılıq əldə olunub. Yəni strateji baxımdan bu gün Azərbaycan və Serbiya biri-biri üçün vacib tərəfdaş hesab olunur. Yaxın gələcəkdə də bu əlaqələrin daha ciddi müstəviyə keçəcəyini görmək mümkündür".
