Bu layihə daha çox nəqliyyat marşrutunun rəqəmsallaşdırılmasını nəzərdə tutacaq
Daha bir TransXəzər rəqəmsal platforması yaradılır.
Bu informasiya Qazaxıstan–Azərbaycan İşgüzar Şurasının iclasında verilib.
TransXəzər Beynəlxalq Nəqliyyat Marşrutu (Orta Dəhliz) Beynəlxalq Assosiasiyasının baş katibi Qaydar Abdikerimov deyib ki, Orta Dəhliz boyunca Rəqəmsal Platforma yaradılır və o, bu ilin sonu və ya gələn ilin əvvəlində istifadəyə veriləcək. Onun sözlərinə görə, bu platforma Sinqapurun “PSA International” şirkətinin törəməsi olan “Global DTC” (Digital Transport Corridor) tərəfindən hazırlanır və o, bütün dəhliz boyu əməliyyatları sürətləndirmək üçün nəzərdə tutulub.
Azərbaycan İnternet Forumunun prezidenti Osman Gündüz isə “Sherg.az"a açıqlamasında Orta Dəhliz boyunca Rəqəmsal Platformanın yaradılmasının çox maraqlı məsələ olduğunu deyib:
“Daha öncədən də Azərbaycan və Qazaxıstan arasında Xəzərin dibi ilə fiberoptik rabitə xəttinin çəkilməsini nəzərdə tutan TransXəzər rəqəmsal layihəsi vardı. Bununla bağlı hökumətlərarası anlaşmalar var. Azərbaycanın və Qazaxıstanın aparıcı telekommunikasiya şirkətləri "AzerTelecom" və "Kazakhtelecom" arasında “Rəqəmsal İpək Yolu” - əsas hissəsi olan Transxəzər Fiber-Optik Kabel Xətti layihəsi ilə bağlı müqavilələr bağlanıb, ortaq müəssisə yaradılıb. Bu açıqlamadan isə belə anlaşılır ki, yeni bir Orta Dəhliz rəqəmsal platforması yaradılır. Güman ki, bu layihə daha çox nəqliyyat marşrutunun rəqəmsallaşdırılmasını nəzərdə tutacaq. Hələliksə digər maraqlı tərəflər bununla bağlı açıqlama verməyiblər”.
