Pişiyi öldürən şəxs 2 il 6 ay həbs cəzası aldı
Yeni il gecəsi liftin içində pişiyi təpikləyərək öldürən İbrahim Kəloğlan 2 il 6 ay müddətinə azadlıqdan məhrum edilib. “Sherg.az” “NTV.com.tr”yə istinadən bildirir ki, hadisə yanvarın 1-i İstanbulun Başakşəhər səmtindəki yaşayış binalarından birinin liftində olub. İbrahim Kəloğlan liftin içinə sığınmış Eros adlı pişiyi 6 dəqiqə ərzində dəfələrlə təpikləyərək öldürüb. Bu dəhşətli davranış liftdə quraşdırılmış müşahidə kamerası tərəfindən qeydə alınıb. Kamera görüntülərinin incələnməsi sayəsində pişiyin qatili tapılıb. Məhkəmə İ.Kəloğlana əvvəlcə 1 il 3 ay həbs cəzası kəsib. Lakin heyvansevərlərin təpkisi səbəbindən pişik qatili yenidən hakim qarşısına çıxarılıb. Bu dəfə onun cəzası ağırlaşdırılaraq “qəsdən heyvan öldürmə” maddəsi ilə 2 il 6 aya çatdırılıb. Məhkəmədə İ.Kəloğlan etdiyi hərəkətdən peşman olduğunu, heyvanları, o cümlədən də pişikləri sevdiyini, özünün də evdə pişik saxladığını, heyvan sığınacaqlarına yardım etdiyini söyləsə də, hakim onun sözlərinə inamsız yanaşıb və “aktyorluq etmə, ürəyindən gələnləri söylə”, deyə təpki göstərib. İ.Kəloğlan “bu, həyatım sonunadək unutmayacağım hadisədir” deyərək, qətli stress, psixoloji gərginlik anında törətdiyini etiraf edib.
