Hətta sonda Avropa da güclü tərəfdaşlara görə zəif tərəfdaşı qurban verəcək
ABŞ Prezidenti Donald Trampın komandasının üzvləri Ukrayna Prezidenti Volodimir Zelenskinin siyasi rəqibləri ilə görüşüb.
Bu barədə “Politico” məlumat yayıb.
Məlumata görə, Trampın komandasının yüksək vəzifəli üzvləri Ukrayna müxalifətinin lideri, keçmiş Baş nazir Yuliya Timoşenko və keçmiş prezident Petro Poroşenkonun partiyasının üzvləri ilə gizli danışıqlar aparıblar.
Qeyd edilib ki, müzakirələr Ukraynanın tezliklə prezident seçkilərini keçirib-keçirməyəcəyi ilə bağlı olub.
Politoloq Əhəd Məmmədli "Sherg.az"a deyib ki, bu gedişat onu göstərir ki, Zelenski Prezident kürsüsünü tərk edəcək:
"Ukrayna Prezidenti artıq Moskva və Vaşinqton üçün xoşagəlməz şəxsə çevrilib. Düşünmürəm ki, Avropa Zelenskini qoruya biləcək. Üstəlik, Brüssel Vaşinqtona qarşı Zelenski ilə bərabər vuruşmağı gözə almaz. Hətta sonda Avropa da güclü tərəfdaşlara görə zəif tərəfdaşı qurban verəcək. Görüşlər, protokollar, bəyannamələrlə harasa qədər gedə bilərlər. Lakin vəziyyət seçim anına gələndə Avropa praqmatik davranacaq. Bu isə heç də Zelenskinin xeyrinə olmayacaq. Digər tərəfdən Ukraynada müxalifət yenidən danışmağa başlayıb, əvvəlki cəbhə yoxdur. Bütün bunlar gələcəkdə Zelenskiyə qarşı istifadə edilə, siyasi fiqurlar ona qarşı ittifaq qura bilər. Ukrayna Prezidenti seçkilərə və ya istefaya məcbur edilərsə, sonrakı mərhələdə ölkədə iqtidar dəyişəcək".
