Dünya ictimaiyyəti təzyiqi artırmasa, Rusiya Federasiyası Ukraynaya qarşı müharibəni dayandırmaq üçün real addımlar atmayacaq.
Teleqraf xəbər verir ki, bu barədə Ukrayna Prezidenti Volodimir Zelenski X mikrobloqunda yazıb.
O, Moskvanın Amerika Birləşmiş Ştatlarının tam atəşkəs təklifini artıq 54 gündür ki, nəzərə almadığını xatırladıb. Kiyev üçün atəşkəs istənilən vaxt mümkündür, lakin diplomatiyaya həqiqi şans vermək üçün onun müddəti azı 30 gün olmalıdır:
"Putin paradda tanklarını nümayiş etdirməklə öyünmək istəyir, amma müharibəsini necə bitirmək barədə düşünməlidir. Üç şey tələb olunur: Rusiyaya qarşı sərt sanksiyalar, Ukraynaya dəstəyin davam etdirilməsi və bütün Avropada müdafiə sahəsində əməkdaşlığın əhəmiyyətli dərəcədə gücləndirilməsi. Rusiya dərk etməlidir ki, avropalılar özlərini qorumağa qadirdirlər".
