İran Xarici İşlər Nazirliyinin nümayəndəsi İsmayıl Bəqayi CNN-ə açıqlamasında bildirib ki, Tehran İsrailin mümkün hərbi zərbələrinə baxmayaraq, nüvə proqramı üzrə ABŞ ilə danışıqlarda təzyiqlərə tabe olmayacaq. O qeyd edib ki, iranlılar heç bir təzyiqə boyun əyməyəcəklər. Biz öz milli təhlükəsizliyimizi qoruyacağıq.
İranın “təzyiqlərə boyun əyməyəcəyik” bəyanatı, əslində, təkcə nüvə danışıqları və ya İsrailin təhdidlərinə cavab deyil, bu, həm də bölgədə güc nümayişidir. Yaxın Şərqdə güc balansı daim dəyişkən və kövrəkdir. İran öz hərbi və texnoloji gücünü ön plana çəkməklə, yalnız ABŞ və İsrailə deyil, eyni zamanda regiondakı digər güc mərkəzlərinə siqnal göndərir.
Orta Doğu Araşdırmalar Mərkəzinin sədri, politoloq Sədrəddin Soltan Sherg.az-a bildirib ki, bu Tehran hakimiyyəti təmsilçilərinin ənənəvi hərbi ritorikasıdır:
“Ötənilki hadisələr göstərir ki, Tehran hakimiyyəti raket zərbələrindən qorunmağa qadir deyil. Bu isə İran üçün böyük fəlakətlər gətirə bilər. İranla ABŞ nümayənləri arasında görüşlər həyata keçirilir. Eyni zamanda regiondakı Ərəb ölkələriylə ABŞ arasında yeni müqavilələr imzalanıb. Amerika onları özünə daha çox bağlama çalışır. Belə olan halda isə İran təklənir və ölkə daxilində ciddi narahatlıqlar yaradır. Tehran rəsmilərinin bu cür ritorikaları ictimai rəyə hesablanıb. Bu beynəlxalq miqyasda isə İsraili və Amerikanı İranı vurmaqdan çəkindirmək üçün bir addımdır. Sözügedən məsələ İranın hərbi gücünün qeyri-müəyyən olduğundan xəbər verir. Yəni İran rəsmiləri beynəlxalq ictimaiyyətə onların göründüyü qədər zəif olmadıqlarını göstərmək niyyətindədirlər”.
