Tramp və Putinin qarşılıqlı ittihamlarla vəziyyəti gərginləşdirdiyi bir vaxtda, Türkiyənin bu təşəbbüsü Ukrayna böhranının həllinə və bölgəyə sülhün gəlməsinə töhfə verə bilər
Türkiyənin xarici işlər naziri Hakan Fidan yaxın günlərdə Ukraynanın paytaxtı Kiyevə rəsmi səfər edəcək. Bu barədə məlumatı "Reuters" agentliyi yayıb.
Məlumata görə, səfərin əsas məqsədi Ukrayna ətrafında cərəyan edən son hadisələri, xüsusilə də bölgədə davam edən münaqişənin həlli yollarını müzakirə etməkdir. Hakan Fidan bu səfər çərçivəsində Ukrayna rəsmiləri ilə bir sıra mühüm görüşlər keçirəcək, tərəflər arasında mümkün sülh təşəbbüsləri və regional sabitlik məsələləri ətrafında fikir mübadiləsi aparılacaq.
Hazırda nazir Rusiyanın paytaxtı Moskva şəhərindədir. Orada o, Rusiya Prezidenti Vladimir Putin və xarici işlər naziri Sergey Lavrovla görüşərək Ukrayna ilə bağlı geniş müzakirələr aparıb. Fidanın Kiyevə səfəri isə bu danışıqların ardınca, diplomatik təmasların davamı olaraq baş tutacaq. Bu diplomatik missiya, Türkiyənin Rusiya və Ukrayna arasında vasitəçi rolunu gücləndirməsi baxımından xüsusi əhəmiyyət kəsb edir.
Ankarada fəaliyyət göstərən Qafqaz Strateji Araşdırmalar Mərkəzinin (KAFKASSAM) sədri, politoloq Hasan Oktay Sherg.az-a deyib ki, Rusiyа-Ukrayna böhranı artıq elə bir mərhələyə gəlib çatıb ki, ya diplomatik danışıqlarla həll yoluna qədəm qoyulacaq, ya da proses daha da dərinləşərək Avropada böyük bir siyasi qarşıdurmaya çevriləcək:
"Xüsusilə Trampın seçki kampaniyası dövründə və prezidentliyə başladıqdan sonra verdiyi açıqlamalarda Ukrayna böhranının tezliklə sona çatması üçün iradə nümayiş etdirməsi diqqət çəkmişdi. Lakin hadisələrin inkişafı göstərdi ki, Ukrayna böhranı ciddi bir çıxılmaz vəziyyətə girib. ABŞ bir növ Rusiya ilə münasibətləri yumşaldaraq, bu böhranı Avropa İttifaqı ilə Rusiya arasında bir problemə çevirib. Bu məqamda Türkiyə, həm Rusiyaya, həm də Ukraynaya Qara dəniz üzərindən qonşu olan bir ölkə kimi, bölgədə sülhün bərpası üçün ən açıq və prinsipial mövqe sərgiləyən tərəf olub. Birinci və ikinci İstanbul sülh danışıqları Ukrayna böhranı çərçivəsində atılmış ən real və ümidverici addımlar kimi qiymətləndirilir".
Politoloq əlavə edib ki, bu gün Türkiyənin xarici işlər naziri Hakan Fidan Moskvada Vladimir Putin və Sergey Lavrovla görüşlər keçirib, Ukrayna mövzusunda geniş müzakirələr aparıb:
"O, oradan birbaşa Kiyevə yollanaraq Ukrayna rəsmiləri ilə də görüşlər keçirəcək və sülh ümidlərinin yenidən canlanmasına çalışacaq. Tramp və Putinin qarşılıqlı ittihamlarla vəziyyəti gərginləşdirdiyi bir vaxtda, Türkiyənin bu təşəbbüsü Ukrayna böhranının həllinə və bölgəyə sülhün gəlməsinə töhfə verə bilər".
