Indiki mərhələdə imzalanacaq sülh sənədi Ermənistan Konstitusiyasına zidd olacaq və sadəcə Paşinyanın siyasi və marginal maraqlarına xidmət edəcək
Paşinyan yarımçıq sülhün imzalanmasına tələsir
Baş nazir seçki ərəfəsində referendumdan yayına bilər
İrəvan və Bakı sülh sazişinin imzalanma tarixini müəyyən etmək üçün ikitərəfli məsləhətləşmələri davam etdirir. Bunu Ermənistanın Baş naziri Nikol Paşinyan deyib. Baş nazir həmçinin qeyd edib ki, Türkiyə ilə də fəal dialoq aparılır. Ermənistanın Təhlükəsizlik Şurasının katibi Armen Qriqoryan da deyib ki, Azərbaycanla Ermənistan arasındakı sülhyaratma prosesində irəliləyiş müşahidə olunur. O söyləyib ki, sülh gündəliyi tam olaraq reallaşmasa da bu məsələ ilə bağlı nəticələr var. A.Qriqoryan tərəflər arasında mütəmadi diplomatik təmasların olduğunu da açıqlayıb. Ermənistan TŞ katibi Azərbaycanla sərhədin demarkasiyasından da danışıb. Qriqoryan bildirib ki, sərhədlərin demarkasiyası prosesi yerində dayanmır: "Baş nazirlərin müavinləri səviyyəsində işçi qrupları əlaqə saxlayır və çalışmağa davam edir". O qeyd edib ki, son razılaşmalara əsasən, demarkasiya Ermənistan-Gürcüstan-Azərbaycan sərhədindən bir qədər aşağıda davam edəcək və danışıqlarla həll yollarına nail olmağa çalışılacaq.
Politoloq Məhəmməd Əsədullazadə Sherg.az-a bildirib ki, əgər Ermənistan tərəfi 2026-cı ilədək referendum keçirməsə, Konstitusiyanı dəyişdirməsə, sülh müqaviləsi də olmayacaq. Analitik qeyd edib ki, Ermənistan tərəfi birmənalı deyir ki, Konstitusiya dəyişikliyi və referendum məsələsi 2027-ci ildə baş tuta bilər:
"Yəni 2026-cı ildə keçiriləcək parlament seçkilərində Nikol Paşinyan hakimiyyətini qoruyub saxlaya bilsə, referenduma gedəcək və Konstitusiyanı dəyişdirəcək. Bundan sonra sülh müqaviləsinin imzalanması mümkün olar. Azərbaycan indiki dövrdə tələm-tələsik sülh sazişinə imza atmaqda maraqlı deyil. Hazırda yarımçıq sülhün imzalanmasında tələsən məhz Paşinyandır. Baş nazir çalışır ki, nəyin bahasına olur-olsun sülh müqaviləsinə imza atsın və 2026-cı ildə daxili auditoriyaya bəyan etsin ki, o, Azərbaycanla sülh bağladı. Bununla əlini gücləndirmək istəyir. Lakin dəfələrlə vurğulanıb ki, indiki mərhələdə imzalanacaq sülh sənədi Ermənistan Konstitusiyasına zidd olacaq və sadəcə Paşinyanın siyasi və marginal maraqlarına xidmət edəcək. Təbii ki, Azərbaycan buna getməyəcək. Ermənistan istəsə bir aydan sonra da referendum keçirə bilər. Yubatmağın səbəbi odur ki, Paşinyan seçki ərəfəsində referenduma getmək istəmir. Ermənistan müxalifəti son dövrdə fəallaşıb. Onlar referendumu anti-təbliğat kimi dövriyyəyə buraxacaqlar və iddia edəcəklər ki, N.Paşinyan bir çox əraziləri Azərbaycana verəcək. Baş nazir bundan ehtiyatlanır və seçkiyə kimi referenduma getmək istəmir".
