Son aylarda Rusiyada müxtəlif regionlarda azərbaycanlı diaspor təşkilatları ilə əlaqəli şəxslərin və iş adamlarının həbsi halları intensivləşib. Bəzi siyasi şərhçilər hesab edirlər ki, Moskva hazırda həm daxildə iqtisadi, həm də etnik balansı nəzarətdə saxlamaq üçün belə sərt tədbirlərə əl atır.
Rusiya tərəfindən sərgilənən bu siyasət bölgədə sabitliyə deyil, qarşıdurmaya və etimad itkisinə xidmət edir. Əgər Moskva regional əməkdaşlığı və tərəfdaşlığı davam etdirmək istəyirsə, əvvəlcə müttəfiq dediyi ölkələrə qarşı bu cür düşmən yanaşmadan imtina etməlidir.
Politoloq Oqtay Qasımov Sherg.az-a deyib ki, Rusiyada azərbaycanlılara qarşı təzyiq kampaniyası davam etməkdədir:
"Sverdlovsk vilayətində “mutuvali” şifrəli risklərə istinadla bir cinayət işinin qaldırılması da bu kampaniyanın tərkib hissəsi və siyasi xarakterli addım kimi qiymətləndirilə bilər. Əslində Rusiya Azərbaycana qarşı mövqeyini dəyişmək və yumuşaltmaq barədə düşünmür. Əksinə, məsələləri daha da gərginləşdirməyə çalışır.
Əgər nəzərə alsaq ki, Rusiya Federasiya Şurasının üzvləri, o cümlədən Sergey Mironov tərəfindən səsləndirilən fikirlər və bəyanatlar da bu istiqamətdədir. Rusiya rəhbərliyi Azərbaycanla yalnız təzyiq dili ilə danışmaq niyyətindədir. Lakin bu yanaşma nəticə verəcəkmi? Münasibətlər normallaşmadığı təqdirdə bunun faydalı olacağını düşünmürəm.
Hüquqi baxımdan da burada bir yanlışın digər yanlışla əvəz olunması müşahidə olunur. Azərbaycana qarşı təzyiq siyasətinin Rusiya üçün hər hansı fayda verəcəyini zənn etmirəm. Əksinə, bu addımlar Azərbaycan cəmiyyətində anti-Rusiya meyillərini gücləndirəcək".
Analitil əlavə edib ki, necə ki, postsovet məkanının digər ölkələrində olduğu kimi, Azərbaycanda da bu cür davranışlar Rusiyanın nüfuzuna mənfi təsir göstərəcək:
"Nəticə etibarilə Kremlin bölgədəki təsir imkanlarının azalması ilə nəticələnəcək. Azərbaycanla və digər ölkələrlə normal, tərəfdaşlıq əsaslı münasibətlər qurmaq əvəzinə, onları keçmişin “asılı bölgələri” kimi görmək, təşəxxüslə yanaşmaq və imperiya təfəkkürü ilə hərəkət etmək Rusiyanın ən böyük səhvlərindən biridir. Məhz bu yanaşma Rusiyanın Cənubi Qafqazda nüfuzunun zəifləməsinə səbəb olan əsas amillərdəndir".
