Qarşıdan növbədənkənar parlament seçkiləri gəlir. Millət vəkilliyinə namizədlər arasında sənət adamlarının da adı hallanır. Azərbaycanın bir neçə sənət adamının parlament seçkilərinə qatılması barədə söz-söhbətlər, müzakirələr gündəm olub. Parlamentə namizədlər arasında Xalq artistləri Afaq Bəşirqızı, Faiq Ağayev, Əməkdar artist Elza Seyidcahanın da adı hallanır.
Xalq artisti Afaq Bəşirqızının millət vəkili olması ilə bağlı sosial şəbəkədə kampaniya başlayıb.
Bir çox tanınmış aktrisanın fotosunu yayımlayaraq, onu deputat kimi görməyi arzuladığını yazıb.
Xalq artisti Afaq Bəşirqızı sosial şəbəkədə millət vəkili olması ilə bağlı başlanılan kampaniya və yayılan məlumatlara münasibət bildirib. Xalq artisti belə bir təklifin onun üçün sürpriz olduğunu bildirib:
“Belə bir təklifin olması özüm üçün də sürpriz oldu. Hamıya minnətdarlığımı bildirirəm. Amma hələlik bu barədə fikirləşmirəm. Hazırda yeni layihələrim var. Başım onlara qarışıqdır. İnsanlar məni parlamentdə görmək istəyirlərsə, buna təbii ki, sevinirəm. Demək xalq arasında o etimadı doğrultmuşam. Amma mən hələ belə bir qərara gəlməmişəm”.
“Sənət dostlarından kimlərsə bununla bağlı sizinlə əlaqə saxlayıb” sualına gəlincə, Afaq Bəşirqızı belə deyib:
“Xeyr. Çünki buna vaxtım yoxdur. Bütün günü yeni layihə ilə bağlı axşam saat 23:00-a kimi çalışıram. İnanın ki, hər gün evə yorğun gəlirəm”.
Qeyd edək ki, sosial şəbəkələrdə sənətçilərin bir çoxu Afaq Bəşirqızının şəklini yayaraq, onun deputat olmasını istəmələri ilə bağlı paylaşımlar edib. Hətta bununla bağlı sosial şəbəkələrdə kampaniyalar belə başladılıb.
Xalq artisti Faiq Ağayevlə də əlaqə saxladıq. Faiq Ağayev "Şərq"ə açıqlamasında hələ bu barədə danışmağın tez olduğunu söylədi:
"Hələ parlamentə seçkilərin nə vaxt keçiriləcəyi bəlli deyil. Bu barədə konkret fikir bildirmək düşünürəm ki, tezdi. Hadisələri qabaqlamadan bir az səbrli olmaq məncə ən doğru addımdı".
