"Vaşinqtonda Azərbaycan və Ermənistan xarici işlər nazirləri arasında keçirilən görüşlər fərqlidir". Bunu Ankara Universitetinin professoru, politoloq Toğrul İsmayıl deyib. Professor bildirib ki, ABŞ Azərbaycan və Ermənistan arasında aparılan danışıqları öz nəzarətinə almaq istəyir: "Qarabağ məsələsinə Ağ Evin yanaşması bəllidir. Birdən-birə Vaşinqtonun mövqeyinin dəyişəcəyini söyləmək doğru deyil. Bizim üçün əsas məsələ Azərbaycanın ərazi bütövlüyünün bərpası, təmin olunması və Ermənistanla qalıcı sülhün imzalanmasıdır. Ermənistan hökuməti hələlik buna yaxın durmur. Qarabağdakı ermənilərin "təhlükəsizliyini" bəhanə edərək sülh prosesini, bu istiqamətdə aparılan danışıqları mümkün qədər yubatmaq məqsədi güdürlər. Prosesin uzanması kənar dövlətlərin də maraqlarına uyğundur. Ancaq beynəlxalq hüquq açıq şəkildə Azərbaycanın yanındadır. Bir qrup erməninin Azərbaycanın hansısa bölgəsində yaşaması həmin ərazinin "Ermənistan torpağı" elan olunmasına imkan vermir. Tarixi həqiqətləri bir kənara qoysaq belə, bu, beynəlxalq hüquq baxımından qeyri-mümkündür".
T.İsmayıl vurğulayıb ki, Ermənistan mövcud reallığı qəbul etməli, Azərbaycanın ərazi bütövlüyünü tanımalı və sülh müqaviləsinə imza atmalıdır: "İrəvan sülhə məcburdur. Ermənilərin bütün təxribatlarına cavab verilir və veriləcək. Azərbaycanın əlində yetərli güc var ki, həm Qarabağdakı silahlı dəstələrinin, həm də sərhəddə atəşkəsi pozan Ermənistan ordusunun layiqli dərsini versin. İrəvan anlamalıdır ki, sülhün gecikməsi ilk növbədə Ermənistanın əleyhinədir. Əfsuslar ki, Rusiya sülhməramlıları da üzərinə düşən öhdəlikləri yerinə yetirmir. 2020-ci ilin noyabr ayında imzalanmış üçtərəfli anlaşmaya görə, Qarabağdakı silahlı birləşmələr bölgəni qeyd-şərtsiz tərk etməli idi. Amma ötən müddət ərzində bunu müşahidə etmədik, əksinə, erməni dəstələrinə silah-sursat daşındı. Bu da onu göstərir ki, Rusiya tərəflər arasında sülhün əldə olunmasında, problemin çözülməsində maraqlı deyil".
