ABŞ prezidenti Co Bayden sosial media hesabından paylaşdığı paylaşımda İsveçin NATO-ya qəbulu ilə bağlı Türkiyə ilə əldə olunan razılaşmaya işarə edərək, “Prezident Ərdoğan, cəsarətinizə, liderliyinizə və diplomatiyanıza görə təşəkkür edirəm” deyib.
Sherg.az türk mediasına istinadən xəbər verir ki, Bayden NATO sammiti ilə bağlı Twitter hesabında prezident Rəcəb Tayyib Ərdoğanla görüşünün video kollajını yayıb.
Bu sammitin NATO-nun müdafiəsinə sadiqliyini bir daha təsdiqlədiyini qeyd edən Bayden, "Ümid edirəm ki, bunu daha da gücləndirməyə davam edə bilərik" deyə vurğulayıb.
Prezident Ərdoğan da öz növbəsində NATO Zirvəsi ilə bağlı Twitter hesabından paylaşım edərək təşəkkür edən ABŞ prezidenti Co Baydenə Twitter hesabından cavab verib.
Türkiyənin həmişə olduğu kimi səmimiyyət, məsuliyyət hissi və prinsipial mövqe ilə NATO-nun genişlənməsinə və ittifaqın güclənməsinə dəstəyini davam etdirəcəyini vurğulayan Ərdoğan deyib:
"İnanıram ki, Alyansımız bütün təhlükəsizlik çağırışlarına, xüsusən də terrorizmə qarşı mübarizəyə qarşı güclü həll yolları yaratması və müttəfiqlər arasında əlaqələrin gücləndirilməsi regional və qlobal sülhün bərqərar olunmasında böyük rol oynayacaq. Biz konstruktiv mövqeyimizi qoruyub saxlayacağıq. Cənab Prezident, Alyansa şəxsi dəstəyinizə, xoş arzularınıza görə təşəkkür edirəm”.
