Bu gün Türkiyə Prezidenti Rəcəb Tayyib Ərdoğan Azərbaycanın xarici işlər naziri Ceyhun Bayramovu qəbul edəcək.
Bu barədə Türkiyə Prezident Administrasiyası məlumat verib.
Baş tutması planlaşdırılan görüş barədə "Sherg.az"a açıqlama verən hərbi-siyasi ekspert Həşim Səhrablı bildirib ki, Azərbaycan və Türkiyə müttəfiq ölkələrdir:
"Bu münasibətlər bütün sahələrdə, o cümlədən Şuşa bəyannaməsi ilə hərbi əməkdaşlığa yüksələcək səviyyədə inkişaf edib. Müttəfiq ölkələr öz xarici siyasət prioritetlərini müəyyən edərkən bir-birlərinin maraqlarını nəzərə alırlar. Ceyhun Bayramovun Türkiyəyə səfərini daha çox Qarabağda baş verən hadisələr fonunda dəyərləndirməliyik. Çünki son 2-3 gün ərzində Azərbaycana qarşı beynəlxalq kampaniya başlayıb. Bu, həmişəki kimi Ermənistanın əli ilə həyata keçirilir. Daha geniş aspektdə görürük ki, xarici qüvvələr ölkəmizə qarşı mənfi imic formalaşdırmaq və Azərbaycanı təcavüzkar dövlət kimi təqdim etmək niyyətindədir. Heç bir ölkə bütün dünya ilə təkbaşına mübarizə apara bilməz. Fikrimcə, Azərbaycan tərəfi hazırki vəziyyətdə Türkiyə ilə məsləhətləşmələr aparacaq. Bundan sonra Qarabağdakı addımlarını qərarlaşdıracaq. Hazırda Qarabağdakı mövcud vəziyyət xoşluqla bitməyəcək nöqtəyə gəlib. Əslində beynəlxalq hüquq çərçivəsində Azərbaycanın olan Qarabağ bölgəsində kənar müdaxilələr görməkdəyik.
Bu müdaxilədə Ermənistanın kənardan dəstəkçiləri var. Bütün bu addımları nəzərə aldıqda Azərbaycan tərəfi bölgədəki vəziyyəti bir güc istifadəsilə nizamlamağa məcburdur. 2020-ci ildə də biz işğala məhz beynəlxalq hüquq ilə deyil, hərbi gücümüzlə son qoymuşduq. Düşünürəm ki, Ceyhun Bayramov Türkiyədə bu məsələlər ətrafında fikir mübadiləsi aparacaq. İnanıram ki, oradakı nəticələr Azərbaycanın maraqlarının yenidən tam şəkildə təmin olunması üçün effektiv nəticələr verəcək. Nəzərə almalıyıq ki, Azərbaycan və Türkiyənin həm də beynəlxalq ticarətdə uğurlu layihələri var. Görüş əsnasında bu məsələlər barəsində də fikir mübadiləsi davam etdiriləcək".
Şahanə Tağızadə
