“Almaniya və ABŞ Ukraynanın NATO-ya üzvlük üçün rəsmi müraciətinə mane olur".
“Report” xəbər verir ki, bunu “Bild” qəzetinə yüksək vəzifəli rəsmi bildirib.
Mənbənin məlumatına görə, Ukrayna Prezidenti Volodimir Zelenski Vilnüsdə keçiriləcək sammitdə rəsmi şəkildə ölkəsinin Şimali Atlantika Alyansına qəbul edilməsini xahiş etməyə hazırlaşırdı: “O, bununla da, münaqişənin sona çatmasına ümid edir. Amma bir sıra aparıcı NATO ölkələri, o cümlədən son vaxtlar bu məsələdə eyni mövqedən çıxış edən Almaniya və ABŞ Kiyevin qarşısını almaq istəyir. Bundan əlavə, bu ölkələrin hakimiyyət orqanları digər NATO üzvlərinə onların mövqelərini dəstəkləmək üçün təzyiq göstərirlər”.
Adı açıqlanmayan mənbə əminliklə söyləyib ki, Berlin və Vaşinqton Kiyevin NATO-ya daxil olmasını təxirə salmaqda israrlı olacaq, çünki belə bir addımın Rusiya ilə müharibəyə səbəb ola biləcəyinə inanırlar.
Qeyd edək ki, iyulun 11-12-də Vilnüsdə NATO-nun sammiti keçiriləcək. Ukrayna Prezidenti V.Zelenski Alyansa üzv ölkələrdən ölkəsinin bloka daxil olmasına qədər olan müddət üçün etibarlı və aydın təhlükəsizlik zəmanəti alacağını gözləyir.
İsveçin Alyansa üzv qəbul olunması məsələsinə gəldikdə, NATO-nun Baş katibi Yens Stoltenberq bildirib ki, İsveç NATO-nun Vilnüsdə keçiriləcək sammitində Alyansa üzv qəbul edilməyəcək.
Xatırladaq ki, sammitin iclasından əvvəl Türkiyə Prezidenti Rəcəb Tayyib Ərdoğan ilə ABŞ Prezidenti Cozef Bayden arasında telefon danışığı olub. Danışıqlar zamanı Ukrayna və İsveçin NATO-ya üzvlüyü, F-16-ların tədarükü, Türkiyənin Avropa İttifaqına tam inteqrasiyası məsələləri müzakirə olunub.
