“Mən oktyabrın 7-si Rusiya Prezidenti Vladimir Putinin ad gününü təbrik etmək üçün zəng edən zaman Azərbaycanla müharibənin dayandırılması üçün ilk cəhd edilib. Putin müharibəni dayandırmaq üçün vasitəçilik səyləri göstərmək istədiyini bildirib. Mən şərtlərlə tanış olub razılaşdığımı dedim. Biz hesab edirdik ki, atəşkəs heç bir ilkin şərt olmadan əldə edilməlidir”.
APA xəbər verir ki, bu barədə Ermənistanın Baş naziri Nikol Paşinyan 44 günlük müharibədə baş vermiş hərbi əməliyyatların şəraitinin araşdırılması üzrə parlament komissiyasının iclasında deyib.
Onun sözlərinə görə, həmin gün axşam Putinlə təkrar dialoqu baş tutub və o deyib ki, Prezident İlham Əliyev bununla razılaşmayıb: “Növbəti gün isə Putin bildirdi ki, Prezident İlham Əliyev şərt irəli sürüb: Füzuli döyüşsüz təslim edilməli, Ermənistan Silahlı Qüvvələri isə Arazboyu istiqamətində Xudafərin su anbarına qədər geri çəkilməlidir və həmin ərazilər Azərbaycanın nəzarətində olmalıdır.
Əlavə olaraq, rəsmi Bakı, hərbi əsirlərin qaytarılmasının mümkünlüyünü nəzərə alaraq, Şahbaz Quliyev və Dilqəm Əsgərovu geri qaytarmaq istədi. Bunun müqabilində isə hərbi əməliyyatların dayandırılması təklif edilmədi. Azərbaycan döyüşlərdə həlak olanların dəfni üçün humanitar barışıq təklif etdi və müharibəyə yenidən başlamamaq barədə üzərinə heç bir öhdəlik götürmədi. Mən həmçinin, geri çəkilən erməni qoşunlarını atəşə tutmayacağına dair Azərbaycan tərəfindən zəmanətin olmadığına görə etiraz etdim. Buna baxmayaraq, dedim ki, Xudafərin su anbarından birgə istifadə mümkündür, Azərbaycan Prezidenti nə qədər hərbi əsir qaytaracağını Rusiyaya desə, mən Şahbaz Quliyev və Dilqəm Əsgərovun qaytarılması məsələsini də müzakirə edə bilərəm. Füzulinin döyüşsüz təslim edilməsini qəbuledilməz hesab etdiyimi bildirdim, amma humanitar atəşkəsi tam qəbul etdiyimizi dedim”.
Qeyd edək ki, hazırda Ermənistan parlamentində 44 günlük müharibənin araşdırılması üzrə komissiyanın iclası Baş nazir Nikol Paşinyanın iştirakı ilə keçirilir. İclasa bir sıra yüksək rütbəli hərbi və siyasi xadimlər də dəvət edilib.
