Rusiya Prezidenti Vladimir Putin bildirib ki, Ukrayna gec-tez özünün qərb torpaqlarını itirəcək.
Sherg.az xəbər verir ki, Putin bu fikirləri Sankt-Peterburqda Hərbi Dəniz Donanması Günü münasibətilə Rusiya hərbi dənizçiləri ilə görüşü zamanı səsləndirib.
"Əminəm ki, Ukrayna gec-tez bu qərb torpaqlarını itirəcək. Vaxtilə Polşaya, Macarıstana və Rumıniyaya məxsus olmuş ərazilər gec-tez öz tarixi yerini tutacaq. Bu, sabah və ya birigün baş verməyə bilər. Bir il, iki il, on il və ya on beş ildən sonra olsa belə, tarixən hər şey öz yerinə qayıdacaq", - deyə Rusiya Prezidenti bildirib.
Putinin sözlərinə görə, Rusiya Ukraynanın ərazi bütövlüyünün yeganə təminatçısı olub.
"Ukraynanın ərazi bütövlüyünün yalnız bir təminatçısı var idi - bu da Rusiya idi. Lakin onlar Rusiyanı özlərinə düşmən elan etməyi, rusları isə Ukraynada 'titul xalq olmayan millət' kimi təqdim etməyi məqsədəuyğun hesab etdilər. Bu isə tamamilə cəfəngiyyatdır", - deyə o bildirib.
Putin qeyd edib ki, Rusiya, onun sözlərinə görə, Kiyev hakimiyyətinin başladığı hərbi əməliyyatları dayandırmağa çalışaraq "xüsusi hərbi əməliyyata" başlamağa məcbur olub.
Rusiya Prezidenti, həmçinin, NATO-nun əvvəllər verdiyi vədlərə əməl etmədiyini iddia edib.
"Vaxtilə bizə, Mixail Sergeyeviç Qorbaçova NATO-nun genişlənməyəcəyi vəd edilmişdi. Lakin bizim çoxsaylı etirazlarımıza baxmayaraq, NATO ardıcıl şəkildə genişləndi. Onlar verdikləri vədlərə heç bir əhəmiyyət vermədilər", - deyə Putin bildirib.
Onun sözlərinə görə, cəbhə xəttində döyüşən hərbçilər özlərini vahid ailənin üzvləri kimi hiss edirlər və bu, hər bir ölkə üçün olduqca mühüm amildir. Putin hesab edir ki, "xüsusi hərbi əməliyyat" başa çatdıqdan sonra da Rusiyada bu birlik hissi qorunub saxlanmalıdır.
"Xüsusi hərbi əməliyyat nə vaxtsa başa çatacaq. Şübhəsiz ki, bu, gec-tez olacaq. Biz həmin birlik keyfiyyətini və bu həmrəylik hissini qoruyub saxlamalıyıq", - deyə Rusiya Prezidenti vurğulayıb.
Putin Rusiyanın qələbə qazanacağına şübhə etmədiyini də bildirib.
"Belə də olacaq, buna heç bir şübhəm yoxdur. Mənim buna dair bir an belə tərəddüdüm yoxdur", - deyə o qeyd edib.
Rusiya 24 fevral 2022-ci ildə Ukraynada hərbi əməliyyatlara başlayıb. Prezident Vladimir Putin bunun məqsədini, onun sözlərinə görə, "səkkiz il ərzində Kiyev rejimi tərəfindən təzyiq və soyqırıma məruz qalan insanların müdafiəsi" kimi izah edib. O bildirib ki, bu çərçivədə Ukraynanın "demilitarizasiyası" və "denasifikasiyası" həyata keçirilməli, Donbasın dinc sakinlərinə qarşı "qanlı cinayətlərdə" məsuliyyət daşıyan şəxslər məhkəmə qarşısına çıxarılmalıdır. Buna cavab olaraq Qərb ölkələri Rusiyaya qarşı genişmiqyaslı sanksiyalar tətbiq ediblər.
