"İyun ayında 24 gün yağış yağıb. Rayonları, kəndləri sel suları basıb, təsərrüfatları məhv edib. Çaylar bol sulu dövrlərində axıb Xəzərə tökülür və duzlaşır, artığı da məcrasından çıxaraq torpaqları sıradan çıxarır".
Bu sözləri iqtisadçı Eldəniz Əmirov deyib. Ekspertin yanaşmasına görə, zərəri faydaya çevirmək üçün Amerika kəşf etməyə ehtiyac yoxdur, sadə bir üsul var:
"Əcdadlarımız da istifadə edib, bu gün Afrikada yaşayan insanlar da bunu edir. Yağış-çay sularından uzunmüddətli faydalanmaq üçün quyular qazıb hazır saxlayırlar. Yağış yağanda, çaylar daşanda quyular dolur və insanlar öz tələbatlarını susuz zamanlardan bununla ödəyirlər. İndi biz durub quyu qaza bilmərik. Amma su anbarları yarada bilərik. Düzdür, son dövrlər bir neçə su anbarının (Güləbird və Qız Qalası) tikintisinə başlanılıb, amma çox azdır. Sürətli şəkildə bu sahəyə ciddi investisiya ayrılmalıdır. Cənubi Qafqazın hər 100 litr suyunun cəmi 10 litri bizimdir. Onun da 70 faizi qonşu olkələrdən gələn çaylar hesabınadır".
E.Əmirov vurğulayıb ki, su anbarları quraqlıq aylarında ölkənin, ələlxüsus da kənd təsərrüfatının suya olan tələbatının ödənilməsində əsas çıxış yoludur: "Su anbarları həm də yeni SES-lərin yaradılmasına, elektrik enerjisi istehsalına imkan verir. Eyni zamanda yağıntılı aylarda camaatın evini, torpağını, əkin-biçinini su basmasına ciddi mane olur. Ötən ay yağıntı kənd camaatına "divan tutub". 38 dəfə dolu düşüb, 55 dəfə sel basıb. Ehtimal ki, qarşıdakı aylarda əksinə olaraq, kənd təsərrüfatı susuzluqdan ciddi əziyyət çəkəcək. Mən bu səhənin mütəxəssisi deyiləm, amma sadə məntiq deyir ki, belə durumda əsas xilaskar su anbarları ola bilər. Yəni çayların aşıb-daşan zamanında xilaskar olan su anbarları quraqlıqda yenə də xilaskar olar".
