Rusiyalı hərbi ekspert: İndi əsas məsələ cəbhəni saxlamaq və sakitliyi qorumaqdır
Vəziyyətin inkişafı üçün bütün mümkün ssenarilərlə strateji nüvə qüvvələrinə mərkəzləşdirilmiş nəzarəti təmin etmək vacibdir.
APA-nın Moskva müxbiri xəbər verir ki, bunu Rusiyanın "Nasionalnaya Oborona" jurnalının baş redaktoru, hərbi ekspert İqor Korotçenko "Vaqner" Özəl Hərbi Şirkətin rəhbəri Yevgeni Priqojinin Müdafiə Nazirliyinə qarşı iddiaları və Moskvaya hərbi yürüş elan etməsi fonunda yazıb.
O, strateji nüvə qüvvələrinə mərkəzləşdirilmiş nəzarətin Rusiya Federasiyası Prezidentinin və Silahlı Qüvvələrinin Ali Baş Komandanının əlində olmalı olduğunu söyləyib.
"Artıq bir ildir ki, mən Rusiya Federasiyası Federal Təhlükəsizlik Xidmətinin Hərbi Əks-Kəşfiyyat İdarəsi əsasında Sovet dövründəki "SMERŞ"in tam hüquqlu və müasir şəraitə uyğunlaşdırılmış analoqunu FTX-ın direktorunun birbaşa tabeçiliyində yenidən yaratmaq ehtiyacını inandırıcı şəkildə əsaslandırıram.
Qərar qəbul edilməyib. Hələ qəbul edilməyib", deyə rusiyalı ekspert xarici ölkələrin kəşfiyyat orqanlarına işləyənlərin olduğuna işarə edib.
Korotçenko, "Vaqner" rəhbəri Yevgeni Priqojinə qarşı FTX-ın silahlı üsyana çağırış faktı ilə cinayət işi açması fonunda Ukrayna cəbhəsində ordunu sakitliyi qorumağa çağırıb:
"İndi əsas məsələ cəbhəni saxlamaq, Ukrayna Silahlı Qüvvələrinin xüsusi əməliyyat zonasında irəliləyən bölmələrini məhv etməkdir və sakitliyi qorumaqdır"
