ABŞ Prezidenti Donald Tramp, Çin ilə aparılan iqtisadi razılaşmanın tamamlandığını elan edib. Razılaşmanın nadir torpaq elementləri və tələbə mübadiləsi kimi sahələri əhatə etdiyi bildirilib.
Sherg.az xəbər verir ki, Tramp açıqlamasında, ABŞ-nin Çin mallarına ümumilikdə 55 faiz, Çin tərəfinin isə 10 faiz gömrük tarifi tətbiq edəcəyini qeyd edib.
Tramp bu barədə Truth Social hesabından paylaşım edərək, Çin ilə razılaşmanın əldə olunduğunu, sənədin həm özünün, həm də Çin lideri Şi Tszinpinin yekun təsdiqinə ehtiyacı olduğunu bildirib.
Tramp qeyd edib ki, Çin, ABŞ üçün vacib olan bütün nadir torpaq elementlərinin təminatını verəcək. O, əlavə olaraq bildirib:
“Eyni şəkildə, universitetlərimizdə təhsil alan Çinli tələbələr də daxil olmaqla razılaşdırdığımız bütün məsələləri biz də Çinə təmin edəcəyik (bu, mənim üçün hər zaman yaxşı nəticələr verib!). Ümumilikdə 55 faiz tarif tətbiq edirik, Çin isə 10 faiz. Münasibətlər mükəmməldir! Marağınız üçün təşəkkürlər!”
Ticarət gərginliyi və razılaşmaya gedən yol
ABŞ Prezidenti Tramp, 2 aprel tarixində Çin də daxil olmaqla bir sıra ticarət tərəfdaşlarına əlavə gömrük vergiləri tətbiq edəcəyini açıqlamışdı. Çin də qarşılıq olaraq ABŞ mallarına vergi tətbiq etmiş, nəticədə ABŞ vergiləri 145 faizə, Çin isə 125 faizə qədər artırmışdı.
Artan gərginlik fonunda ABŞ və Çin rəsmiləri 10-11 may tarixlərində İsveçrənin Cenevrə şəhərində görüşərək qarşılıqlı tarifləri 90 gün müddətinə azaltmaq barədə razılaşmışdılar. 14 maydan etibarən, ABŞ tarifləri 145 faizdən 30 faizə, Çin isə 125 faizdən 10 faizə endirmişdi.
