Prezident İlham Əliyevin Sərəncam ilə Samir Musa oğlu Rzayev “Azərbaycan Hava Yolları” Qapalı Səhmdar Cəmiyyətinin prezidenti təyin edilib.
Trend Samir Rzayevin dosyesini təqdim edir:
Samir Musa oğlu Rzayev 2022-ci ildə Prezident İlham Əliyevin müvafiq Sərəncamı ilə "Azərbaycan Hava Yolları" Qapalı Səhmdar Cəmiyyətinin birinci vitse-prezidenti təyin edilib. Həmin təyinata qədər isə Samir Rzayev "Azərbaycan Hava Yolları" QSC-nin vitse-prezidenti kimi fəaliyyət göstərib. Xatırladaq ki, 2022-ci ildə "Azərbaycan Hava Yolları" QSC-nin Nizamnaməsinə dəyişiklik edilib. Baş nazir Əli Əsədov bununla bağlı qərar imzalamışdı. Qərara əsasən, Azərbaycan Hava Yolları" Qapalı Səhmdar Cəmiyyətinin İdarə Heyətinin tərkibinə dəyişik edilmişdi. Dəyişikliklə İdarə Heyətinin tərkibi 7 nəfərdən- Cəmiyyətin prezidenti, 2 birinci vitse-prezidenti və 4 vitse-prezidentindən ibarət olub. O vaxta qədər isə İdarə Heyətinin tərkibi 7 nəfərdən- Cəmiyyətin prezidenti, birinci vitse-prezidenti və digər vitse-prezidentlərindən ibarət idi. Samir Rzayev Azərbaycan Dövlət İqtisad Universitetini bitirdikdən sonra təhsilini 2003-2004-cü illərdə Böyük Britaniyanın Durham Universitetində davam etdib. Həmin universitetdə “Maliyyə və investisiya” ixtisası üzrə magistr dərəcəsini alıb.
2009-2017-ci illərdə Azərbaycan İpoteka və Kredit Zəmanət Fondunda Maliyyə şöbəsinin müdiri işləyib. Ölkənin aparıcı şirkətlərindən olan “Paşa Holdinq”ə məxsus "Azərbaycan Supermarket" MMC-yə bağlı olan “Bravo” supermarketlər şəbəkəsində satış müdüri vəzifəsində çalışıb.
2022-ci ilin fevral ayında Prezident İlham Əliyevin müvafiq Sərəncamı ilə Samir Rzayev “Azərbaycan Hava Yolları” QSC-nin vitse-prezidenti, noyabr ayında AZAL-ın birinci vitse-prezidenti vəzifəsinə təyin olunub.
Məsələ ilə bağlı iqtisadçı ekspert Xalid Kərimli "Sherg.az"a bildirib ki, bizləri vətəndaş kimi əlverişli şərtlərlə, rahat şəkildə səyahət etmək maraqlandırır:
"Arzu edirik ki, bu istiqamətdə seçimlər genişləndirilsin, müqayisələr edə bilək. Məsələn, yük yoxdursa, niyə pul ödəməliyik? Ümumiyyətlə AZAL çevikliyini artırmalıdır. Ölkənin aeroport istifadəsinin 99.9 faizindən çoxu Heydər Əliyev adına Hava limanının üzərinə düşür. Doğrudur, digər ərazilərdə də aeroportlar fəaliyyətdədir. Ancaq heç biri aktiv istifadə olunmur. Çox miqdarda investisiyalar, beynəlxalq kod alınsa da, faktiki olaraq buraya uçuşlar yoxdur. Yeni rəhbərdən gözləntimiz ondan ibarətdir ki, digər ərazilərdə olan hava limanlarının istifadəsini genişləndirəcək. Çünki bi turizmin inkişafına da kömək olacaq".
