Ukrayna prezidenti Volodimir Zelenski müharibənin yavaş-yavaş Rusiya ərazisinə keçdiyini açıqlayıb. Zelenski əlavə edib ki, bu, qaçılmaz bir prosesdir.
Sherg.az xəbər verir ki, sosial media hesabında video açıqlama verən Ukrayna prezidenti Rusiyanın Ukraynaya qarşı başlatdığı müharibənin gedişatını dəyərləndirib.
"Rusiya təcavüzü döyüş meydanında iflasa uğradı" deyən Zelenski, "Bu gün Rusiya rəhbərliyinin bir-iki həftə davam edəcəyini gözlədiyi xüsusi hərbi əməliyyatın 522-ci günüdür. Ukrayna güclənir. Müharibə yavaş-yavaş Rusiya ərazisinə, onun simvolik mərkəzlərinə və hərbi bazalarına keçir və bu, qaçılmaz, təbii və ədalətli prosesdir” deyə bildirib.
Rusiya Müdafiə Nazirliyi bu gün səhər saatlarında Ukraynanın Moskva vilayətindəki obyektlərə pilotsuz uçuş aparatı (PUA) ilə hücum etmək cəhdinin qarşısı alındığını, PUA-ların isə Rusiya hava hücumundan müdafiə sistemləri tərəfindən məhv edildiyini bildirib.
Moskva meri Sergey Sobyanin isə sosial media hesabından verdiyi açıqlamada Ukraynanın PUA-larla hücum cəhdinin qarşısı alındığını, lakin düşən pilotsuz təyyarələrin Moskvada bəzi qüllələrə dəyərək zərər gördüyünü, ölən və yaralanan olmadığını bildirib.
Digər tərəfdən, sosial mediada yayılan bəzi görüntülərdə, Moskvada göydələnlərin yerləşdiyi "Moskva City" bölgəsinə PUA-lardan birinin düşdüyü zaman partlayışın olduğu görünüb.
Ukraynanın iyulun 24-ü və 28-də Rusiyanın paytaxtı Moskvaya pilotsuz təyyarələrlə hücumlar təşkil etdiyi, ölən və yaralananların olmadığı bildirilib.
Turan
